Aanlyn treffers
Dié voormalige internetreekse is nou volwaardige programme op Showmax.
Reekse op die web het die afgelope dekade aansienlik uitgebrei – en nie net op videodienste soos YouTube en Vimeo nie. ’n Paar webprogramme met ’n slim draaiboek en wat slegs 10 minute lank was, is nou aanlyn beskikbaar as volwaardige TV-programme, met groot begrotings en nóg groter gehore. En jy kan dit op Showmax stroom.
INSECURE (2016-NOU)
Toe dit in 2011 ’n webreeks was, was dié reeks getiteld The Mis-Adventures Of Awkward Black Girl. Die hoofspeler en skepper, Issa Rae (April in die 2019komediefliek Little), wou aandui hoe moeilik dit is om mense te ontmoet in ’n kultureel diverse plek soos New York. Toe dit in ’n volwaardige TV-program verwerk is, het twee dinge verander: New York is vir Los Angeles verruil, en dit gaan nou oor die wêreld, gesien deur die oë van twee besties wat onseker is oor dinge in hul lewe, of dit liefde, diëte of klere is.
TEACHERS (2016-2019)
Daar was ’n regstreekse oorgang van ’n webprogram na ’n TV-reeks in 2016 – alles is dieselfde, insluitende die akteurs (almal genaamd Cate of Kate). In 3 seisoene en 50 episodes beleef die onnies by die fiktiewe Fillmore Elementary School in Chicago belaglike hoogtepunte en betreurenswaardige laagtepunte en talle avonture tussenin, terwyl hulle met droë humor en dikwels gemene geeste probeer om die jaar te oorleef. Ons bejammer regte onderwysers indien hulle slegs ’n fraksie hiervan deurmaak!
RICK AND MORTY (2013-NOU)
Dié program was oorspronklik ’n kortfilmparodie op die Back To The Futureflieks (1985-1990), maar die Adult Swim-netwerk se span het dadelik die potensiaal raakgesien. Gedurende die vyf seisoene het die tyd- en-ruimtereisigers Morty en sy oupa Rick die multiverse deurkruis op hul avonture. Dis verspot, onbeholpe, bleeksielagtig en vol allerhande wetenskaplike beginsels en teorieë, maar dis bowenal ’n avontuurrit saam met die uiteenlopende hoofkarakters terwyl hulle hul plek in die heelal probeer vind.
HIGH MAINTENANCE (2012-NOU)
Wat as episodes van 5 minute oor daggahandel in New York op die web begin het, het ’n trefferreeks met episodes van 30 minute lank geword en is nou in sy vierde seisoen. Die verlengde tyd het die reeks meer ruimte gebied om uit te brei hoe die hoofkarakter “The Guy” sy ware verskaf aan sy klante, wat soos dag en nag verskil. “The Guy” is daardie ou wat ’n ander ou ken en altyd kan help . . .
BOSCH (2014-NOU)
Hieronymus Bosch (Titus Welliver,
Glen Childs in die regsdrama The Good Wife, 2009-2016) is ’n elite-soldaat wat ’n LA-speurder geword het in dié webreeks wat as ’n aanlyn reeks van Amazon Studios begin het. Bosch was, anders as tradisionele webprogramme, ’n reeks van ’n langer formaat wat na die stroomplatforms beweeg het met Bosch en sy vennoot, Jerry Edgar (Jamie Hector, Marlo in The Wife, 2004-2008). Hulle ondersoek hoëprofielmisdaad in Hollywood. Die geskerts tussen die twee hoofkarakters, die slim draaiboek en die allerbelangrike buiteopnames het Bosch een van TV se voorste polisieprogramme gemaak.