NET DIE BESTE

Toe Kevin en die span die hindernisbaan saamgestel het, het hulle gefokus op fiksheid – dit behoort slegs 20 sekondes te duur om elke uitdaging te voltooi, maar jy kan nie ’n sofapokkel wees en verwag om deur te glip nie. “Fiksheid is ’n lewenstyl,” sê Kevin, wat sy persoonlike oefensessies op sy sosiale media-blaaie plaas. “’n Mens kan nie 16 of 17 uur per dag werk en nie in ’n kondisie wees om aan die fisieke vereistes te voldoen nie. Indien jy onvoorbereid na TKO kom, sal jy net enkele van die TKO’s kan doen en geen prys kan verwag nie. Jy kan nie halftoegewyd wees nie.”

Van nader beskou, sal jy sien daar is talle veiligheidsvoorsorgmaatreëls by die speletjies ingebou. “Kyk, jy gaan deur vlieënde voorwerpe getref word en jy gaan met bulte en kneusplekke huis toe gaan. Maar jy gaan nie in ’n rolstoel huis toe gaan nie, verstaan? Ons wil hê die mense moet pret hê en daar is mediese personeel op die stel. Die ergste besering tot dusver is ’n geknakte ego en nat agterent wanneer iemand in die Slammer-speletjie in die water gestamp word,” sê Kevin.

Hoewel daar tot op hede slegs een seisoen van die speletjiesprogram is, is dit pret vir die hele gesin om te stroom. “Ons doen dit vir almal. Jy kan dalk jou eie TKO in jou agterplaas bou en ’n familielid tydens ’n braai uitslaan . . . Daai irriterende tante wat almal se besigheid ken: Kyk wanneer sy loop en ‘woeps!’ oor die kop met ’n Frisbee. Ek spot sommer – moenie dit tuis probeer doen nie. Dis net vir beroepsmense!” • Kevin se bestie Dwayne Johnson

(dr. Bravestone in Jumanji) het sy eie hindernisprogram. Lees meer oor The Titan Games op bl. 18.