Tussen die boere
Theodore Jantjies hou vir die eerste keer sy lyf aanbieder en leer meer van ons land se ryk landbousektor.
Landbouweekliks
Seisoen 17 Dinsdae VIA (*147) 17:30
“Die tydsberekening was so goed,” sê die akteur Theodore Jantjies (Jordan James in die sepie Getroud Met Rugby, lees meer op bl. 31 en 45) oor die geleentheid om deel te word van die leefstylreeks Landbouweekliks as een van die drie nuwe aanbieders.
“Die aankondiging dat Getroud Met Rugby klaar maak (saai nog tot September uit), het in Maart gekom en ek moes ’n kopskuif maak om weer ’n vryskut-akteur te word. Ek het nie iets spesifieks gesoek nie, ek verkies dat dinge natuurlik ontwikkel en dis wat met Landbouweekliks gebeur het. Ek het die oproep ontvang, die werk aanvaar, en in April begin skiet.” En ons het by hom gaan hoor hoe hy nou in sy nuwe rol as TV-aanbieder aanpas.
’N AANPASSING
“Ek is ’n groentjie-aanbieder,” sê Theodore laggend. Ons ken hom goed in sy sepierolle as die prokureur Xander Meintjies in 7de Laan (lees meer op bl. 25) en die rugbyafrigter Jordan, maar nou is hy net Theodore wanneer hy voor die kameralens inskuif. “Dit is ’n aanpassing,” erken hy. “Ek speel nie ’n karakter nie, ek is my-self en moet nie net met die gehoor ’n verbintenis vorm nie, maar ook met die boer met wie ek gesels.”
Met die verfilming van Theodore se eerste Landbouweekliks-episode op die melkplaas Skimmelkrans by George in die Wes-Kaap (episode 6, 17 Mei) het Theodore daarheen gereis met geen vooropgestelde idees nie. “My aanslag is om die plaas in al sy glorie te aanskou en in te drink en dan ’n band op ’n menslike vlak met die boer te bou en hom so gemaklik moontlik voor die kameras te laat voel sodat hy sy storie kan vertel. Ek is net die fasiliteerder,” sê Theodore.
GROOT RESPEK
Theodore is ook in episode 7 (24 Mei) te sien op nóg ’n melkplaas Grasslands Agriculture by die Tsitsikamma. “Ek het soveel respek vir wat boere doen om ons land se ekonomie te ontwikkel, en op die spesifieke plaas gee die eienaar geleenthede aan die werkers om hul eie grond te besit en self te boer en dit maak my hart baie bly.”
Met soveel blootstelling aan boerderye sê Theodore hy dink hy sal ’n kranige wildboer maak, indien die rolle omgeruil sou word. “Daardie wilde diere is so sterk en in die regte omgewing sal hulle floreer en ek sal dit geniet om daarvan deel te wees,” sê hy. Of Theodore ooit ’n insetsel of twee saam met sy twee nuwe medeaanbieders, Vicky Davis (voormalige aanbieder op die leefstylreeks Pasella) en Pietman Geldenhuys (aanbieder van die gesels- en-storieprogram Oppiestoep) in seisoen 17 gaan maak, weet hy nie. “Dit sal beslis groot pret wees, maar die voormalige Landbouweekliksaanbieder wat al meer as 50 episodes geskiet het, Elma Postma het vir my ’n paar wenke gegee oor aanbieding in die spesifieke reeks en dit het my goed voorberei.”
DIE TOEKOMS
Toneelspel sal altyd ’n groot liefde vir Theodore wees, maar vir nou spits hy hom toe op die aanbiedingwerk en sal sien wat die toekoms vir hom inhou.
“Ek het die afgelope twee jaar by Getroud Met Rugby vreeslik geniet en was hartseer toe ek hoor dit kom tot ’n einde. Die vervaardigers by die sepie het vir my die wonderlike geleentheid gegee as akteur en my as regisseur opgelei wat ek graag verder in my loopbaan sal wil gebruik,” sê Theodore.
Theodore oorweeg nie ’n moontlike terugkeer na 7de Laan nie. “Ek het ’n besluit geneem en gaan daarby hou. Ek het ’n rol vertolk en aanbeweeg.”
Benewens Landbouweekliks kan kykers ook gerus na Theodore se stem luister in die telenovelle Verdeelde Liefde wat tans op e.tv se stroomdiens eVOD beskikbaar is. “Ek doen die stemwerk vir die hoofkarakter Mehdi Karaca, ’n gekompliseerde jong man wat deur ’n groep vroue grootgemaak word,” sê Theodore. “Hy is teruggetrokke en stil, maar hy sal hemel en aarde verskuif om sy geliefdes te beskerm.”
Sjoe, dit klink interessant, maar vir nou kyk ons na Theodore in Landbouweekliks waar hy die landbou tot binne-in ons sitkamers bring.