Man van vele talente
Kaz is beslis meer gedrewe en ambisieus as Poenie.
Poena
Seisoen 1 Maandae kykNET (*144) 20:00
Die akteur Kaz McFadden, wat die onnutsige Poenie in die komediereeks Poena vertolk, sê Poenie aard nogal baie na sy neef Poena (Robbie Wessels) maar hy het minder ambisie en dryfkrag as Poena. “Poenie is eintlik ’n tipiese jong man. Hy wil so min moontlik doen vir soveel moontlik geld,” sê Kaz. Die twee vabonde, wat by hul oupa Poen (At Botha), wat tydelik in Paternoster woon, se loodgietersbesigheid werk, het baie streke en hulle kom nogal goed oor die weg. “Behalwe wanneer hulle om hul oupa Poen se aandag meeding of na dieselfde meisie vry,” voeg Kaz by.
KOSTELIKE KOMEDIE
Dit voel amper soos vakansie wanneer Kaz op die stel is. “Dit is soveel pret om saam met Robbie en die ander akteurs te werk. Wanneer ons verfilm, voel dit hoegenaamd nie soos werk nie,” sê hy. “Daar heers ’n gemoedelike atmosfeer voor en agter die kameras.” Eintlik het hy verlede jaar al ’n goeie proeflopie van sy karakter Poenie gehad, want hy het dieselfde karakter gespeel in die rolprent Poena En Poenie, wat in Desember op kykNET uitgesaai is. “Dit was dus vir my ’n groot bonus toe ek hoor daar kom ’n hele reeks oor Poena,” sê hy.
UITEENLOPENDE ROLLE
Toe Kaz in 2006 ’n tweedejaar-dramastudent by PALI (Performing Arts Lifestyle Institute) was, het hy sy tande in die bedryf begin slyp met ’n klein rolletjie, Bennie, in die sepie Binnelanders (lees meer op ble. 28 en 29). “Eintlik was my heel eerste rol Hans, die ruspe in ’n kinderproduksie,” vertel hy laggend.
Nadat hy sy studie voltooi het, het hy by die destydse sepie Villa Rosa ingeval vir die meer permanente rol van Carlo Martinelli. Verskeie rolprente en TVreekse soos Die Uwe Pottie Potgieter (hy was Sebastiaan) en Pandjieswinkelstories (waarin hy Donovan gespeel het) het gevolg. Maar een karakter waarvoor ons hom die beste onthou, is seker Alexander, Nenna (wyle Shaleen Surtie Richards) se kleinseun in Egoli wat hy van 2009 tot 2010 vertolk het.
Kaz lyk jonger as sy 37 jaar en speel daarom dikwels rolle van karakters wat nog nat agter die ore is. “Dit bevoordeel my seker omdat ek meer lewenservaring as van die jonger akteurs het, maar daar sal seker een of ander tyd ’n afsnypunt kom en dan sal ek dalk van ’n jonger laaitie na ’n ou toppie spring,” skerts hy.
VERSKEIE HOEDE
Kaz en die aktrise Lara Lourens, wat ons in 2019 as die deurmekaar blondine Koekie de Kok in die kykNET-komediereeks Huis Lelieveld leer ken het, is al 9 jaar ’n paartjie en ook sakevennote. “Ek en Lara het in 2017 saam met die akteur
Zack Mtombeni (Brutus in 2017 in die romkomfliek Vaselinetjie) die produksiehuis The Third Law, wat rolprente vervaardig, gestig,” vertel hy – en hulle is tans besig met ses nuwe storiefilms vir kykNET. “Ons verrig maar verskillende take. Soms behartig ek die regie en soms tree ek as vervaardiger op. Lara is die hoof van The Third Law en is die vervaardiger van sommige flieks en ander kere weer die regisseur.” Kaz is onder meer die regisseur van die rolprent Ovasie, wat handel oor drie ouer akteurs wat terugkeer na die verhoog, en dié fliek word waarskynlik in Junie op kykNET uitgesaai.
Kaz is ook binnekort te sien in die rolprent Boetie Ontmoet ’n Alien waar André Velts weer die leisels as regisseur en vervaardiger hou. “Dan verflim ons oor ’n maand die rolprent Man Se Plek, en Lara gaan dan die regie doen.”
Kaz het ook al naam gemaak as skrywer van rolprente soos Fladder (2020).
Hy en André bestuur sedert 2018 die dramaskool PALI Incubation. “Ons het omtrent tien dramastudente per jaar en die kursus duur drie jaar wat praktiese onderrig en stelbesoeke insluit.” Kaz gee saam met André, Lara en ’n paar ander akteurs klas.
Hy klink omtrent soos ’n verkleurmannetjie, maar Kaz sê dis heerlik om verskillende rolle te vertolk en van die kamera tot in die klaskamer te kan skuif. “Nóg ’n bonus is dat ek saam met Lara kan werk, ons maak ’n goeie span. Ons droom ook oor talle nuwe rolprente en projekte wat ons nog wil aanpak.”