Private Eyes
Seisoen 3 Universal TV (*117) 20:00 & 20:50 Drama
Die prettige aksiedramareeks Private Eyes is gegrond op die gelyknamige boeke deur die skrywer G.B. Joyce, maar die hoofsterre Cindy Sampson (as privaat speurder Angie Everett) en Jason Priestley (as die hokkiester-speurder) Matt het sekere skeppende vryhede. “Ons kon dinge saam met die skrywers verander,” sê Cindy. “Ons ken ons karakters, ons verstaan hoe hulle dink en wat hulle in sekere situasies sal doen. En dis lekker om hulle in posisies te kry waar hulle onseker van hulleself is . . .”
Dinge het maar sleg gelyk aan die einde van seisoen 2 met Angie agter tralies nadat sy mislei is om ’n hardeskyf vol sensitiewe staatsinligting te steel. “Dis Matt en hul assistent, Zoe (Sam Wan, Sera in die drama-reeks Leslieville) se taak om Angie se onskuld te bewys,” verduidelik Cindy. Maar die tronk is ook waar die speurspan ’n raaiselag-tige nuwe saak kry – Angie ontmoet Loretta (Jann Arden, Jane in die komedie-reeks Workin’ Moms), ’n oordonderende gevangene wat sy later help om regsverteen-woordiging te kry. “Angie help om Loretta en haar dogter te soek. Sy wil aan Loretta bewys daar is goeie mense wat haar wil help,” sê Cindy. “Angie sukkel in die tronk, maar sy sien dit as ’n leerkurwe – as ’n beroepspeurder ken sy net die een kant van die munt. Dis nie altyd maklik om te verstaan hoekom misdadigers doen wat hulle doen nie,” vertel die aktrise.
Die seisoen is in 2018 geskiet en Cindy sê: “Ons was in ons derde seisoen saam, dus het ons mekaar goed geken. Dit was maklik om herskrywings op die nippertjie te doen en tonele aan te pas, want daar was geen Covid-19-beperkings op die stel nie. Baie makliker!”