Myne Vir Joune
Seisoen 3 VIA (*147) 20:00 Realiteit
Jy moet hare op jou tande hê as jy aan Myne Vir Joune wil deelneem, want dié reeks haal jou uit jou gemaksone en laat jou met nuwe oë na jou eie vooropgestelde idees kyk. In sommige gevalle is dit bevrydend, maar ander kere bevestig die kuiers – waar gesinslede van verskillende agtergronde plekke met mekaar ruil – die deelnemers juis dat hul oortuigings die regte ding vir hul gesin is. En natuurlik sorg dit vir groot kykvermaak.
“Dis die beste seisoen tot dusver omdat ons gesinne van regoor die land met mekaar kon ruilkuier te danke aan ons borg die lugredery FlySafair,” sê die vervaardiger van die reeks Amor Engelbrecht. “Gesinne met uiteenlopende politieke sienings, agtergronde, sosiale status en geloofstelsels het met mekaar uitgeruil om te sien of hulle mekaar kan leer verstaan en aanvaar. Soms werk dit uit, soms nie. Dink aan mense wat teen of vir die Covid-19-inentings is (episode 1, 11 Mei); polities aktief teenoor polities apaties (episode 2, 18 Mei); netheid teenoor onnetheid (episode 3, 25 Mei); plattelanders teenoor stedelinge; vegans en jagters; en selfs ook hekse en Christene.”
In die vorige seisoene was daar al wonderlike stories waar die ruilkuiers ’n daadwerlike impak op die gesinne gehad het en diep bande en groot vriendskappe tussen die twee gesinne gevorm is. Amor sê die terugvoering wat hulle in die algemeen van die deelnemers en die kykers kry, is dat dit kennis en aanvaarding bring. “Baie mense is bang vir die onbekende. Die blootstelling aan ander kulture, gelowe en rasse wys dis eintlik alles net ’n dun lagie, en daaronder is ons almal net gewone mense.” Ons kan nie wag om te sien watter openbarings seisoen 3 van Myne Vir Joune gaan bring nie.