Die Bruid-boetiek
Seisoen 3 VIA (*147) 17:30 Leefstyl
Elke bruid het gewoonlik ’n prentjie in haar kop hoe haar trourok moet lyk. Maar dit is nie altyd so maklik om daardie droomrok te kry nie. Die kreatiewe top-ontwerper Diaan Daniels sit weer hand by en gee voornemende bruide nuttige raad en wenke in die derde seisoen van Die Bruid-boetiek. Diaan vertel meer oor die nuwe seisoen.
Wat maak hierdie seisoen van Die Bruidboetiek anders as vorige seisoene? Ek is baie opgewonde oor die nuwe seisoen, want dit wys my nuutste reeks
ready-to-wear- bruidsrokke. Ek dink hierdie nuwe reeks trourokke is nie net mededingend met die oorsese mark nie, maar ek druk ook my unieke stempel daarop af. Boonop is daar ’n groot verskeidenheid om van te kies. Myns insiens is dit my beste werk die afgelope 22 jaar. Wat was jou oorspronklike doel met die
reeks, en dink jy jy slaag daarin? Voornemende bruide is gewoonlik baie skrikkerig vir die hele proses om die regte trourok te kry. Hulle is dikwels onseker vanweë hul gewig of lengte of hulle die geskikte rok gaan kry, en selfs huiwerig om die eerste afspraak by ’n bruidsboetiek te maak. Hulle weet ook nie altyd of hul keuse hul sak gaan pas nie. In
Die Bruid-boetiek wys ek hulle presies hoe die hele proses werk en wat vir hul postuur en by hul persoonlikheid sal pas – en boonop bekostigbaar is. Sowat 90% bruide raak uiteindelik geholpe met ’n trourok wat hulle aanvanklik nie gedink het vir hulle sal werk nie. Wat is die nuutste neigings in trou-rokke?
Die tendense verander maar elke jaar, maar ons probeer altyd om die internasionale modegiere ’n stappie vooruit te wees en die style aan te pas sodat dit ’n kenmerkend SuidAfrikaanse styl het.