DEUR DIE LENS

Tydens die Zambezi-avontuur was Streicher die fotograaf en het onder meer aksiefoto’s en beeldmateriaal met sy hommeltuig verfilm. Hier is van sy gunstelingfoto’s wat tydens episode 6 (9 Mei) by die Victoria-waterval, episode 7 (16 Mei) van die Victoria-waterval tot by die Matusadona Nasionale Park, en episode 8 (23 Mei) van Kariba tot Chitake Springs-kampterrein geneem is:

Nina en Streicher in die helikopter:

Nina (links) saam met Streicher (regs) tydens ’n helikopterrit in episode 6 oor die Victoria-waterval.

Victoria-waterval-lugskoot:

Hierdie asemrowende foto het Streicher met sy kamera uit die helikopter geneem. “Dit was ’n ongelooflike ervaring. Die uitsig was beeldskoon en die vlug in die helikopter was onvergeetlik – veral toe ons tussen die watervalle deur gevlieg het.”

Streicher en die leeu:

Ná die Victoriawaterval-uitstappie besoek Streicher en die Voetspore-span ’n rehabilitasiesentrum waar wilde diere versorg word. “Van hulle sal nooit weer na die wildernis kan terugkeer nie, dus is hulle heel mak en daarom kon ons naby aan hulle beweeg,” sê Streicher.

Land Cruiser:

Hier bestuur Nina die Land Cruiser 4x4 deur die grond en water terwyl Streicher die foto’s neem.

Seekoeie:

Dié pragtige seekoeie het Streicher by die Matusadona Nasionale Park in episode 7 verfilm.

Afrika sonsondergang:

“Afrika is ’n plek wat prentjiemooi afneem,” sê Streicher oor hierdie sonsondergang.

Huisboot:

Die huisboot was Streicher en die Voetspore-span se tuiste vir drie dae tydens episode 8 in Zimbabwe. “Ons het die mooiste wild gesien, soos olifante wat kom water drink het,” vertel Streicher.

Kremetartboom:

Die reusekremetartboom is by die Chitake Springs-kampterrein in episode 8. “Daardie nag terwyl ons gekamp het, het ek nie geslaap nie, want ek het konstant die gebrul van leeus gehoor,” sê Streicher.