Selfdood-skok
Koppe word gekrap oor wie Simon kon help met sy selfdood.
Almal was geskok toe hulle hoor Simon (David Louw), die alomgewilde Stryder-afrigter, het sy eie lewe geneem. Enkele weke gelede moes Simon se geliefdes en die Stryders die slegte nuus verwerk dat Simon tydens ’n fratsongeluk ernstig beseer en verlam is. Dié ongeluk het gebeur nadat die Stryder Zappa (Runaldo Hendricks) hom tydens ’n oefening op Simon se bevel, getakel het. Maar niemand sou ooit kon voorsien Simon sou sy lewe neem en alles sou so tragies eindig nie.
“Simon sou vir die res van sy lewe aan ’n rolstoel gekluister wees en hy kon net nie daarmee vrede maak nie,” vertel Ansu Visser, wat die rol van Lulu, Simon se vrou, vertolk. Maar almal begin nou wonder: Was Simon alleen aandadig aan sy selfdood of het iemand hom gehelp om hierdie drastiese stap te doen. En indien wel, wie?
AGTERDOG
Ansu vertel speurserant
Breytenbach (Jakkie Groenewald) het kort ná Simon se dood vir Lulu gesê hy dink iemand het Simon gehelp om selfdood te pleeg en dit het die saadjie vir agterdog gesaai. Lulu wys ook vir Breytenbach ’n video-boodskap wat Simon voor sy dood vir haar gestuur het. “Simon sê in die video hy gaan ’n dwelmhandelaar vra om vir hom die veemiddel Karfentanil te kry sodat hy sy sinnelose lewe kan beëindig,” vertel sy. En Simon sou weet, want hy het die dwelmsmous se dienste in sy wilde, jonger dae gebruik.
Breytenbach begin oral snuffel en sy speurwerk lei hom na Zappa, die Stryder wat Simon platgetrek het. Maar wanneer hy Zappa – wat Simon ’n paar keer in die hospitaal besoek het – oor Simon se selfdood konfronteer, ontken Zappa enige aandeel daarin.
“Zappa sê vir Breytenbach sy ma het mortorneuronsiekte en hy sal nie vir een oomblik daaraan dink om sy ma te help om haar van dié wreedaardige siekte te verlos nie,” vertel Runaldo, en beklemtoon sy karakter sou dit dan ook nie vir die verlamde Simon doen nie.
DROEWE DAG
Simon se gedenkdiens in Pottie’s, die Stryders se groot kuierplek, is ’n hartseer geleentheid vir al sy geliefdes en spanmaats – en Zappa skitter in sy afwesigheid. En nou begin die Stryders, soos Breytenbach, wonder of Zappa Simon dalk gehelp het om sy laaste wens te bewaarheid.
Maar vir eers tik Breytenbach Zappa se naam van sy lysie af en wonder of Lulu nie die een was wat haar man gehelp het nie. Hy gaan gesels selfs met Simon se gebroke ma,
Yvonne (Karin Retief), oor hierdie moontlikheid. Was Lulu se onvoorwaardelike liefde vir haar Simon dalk so sterk dat sy ook nie kans gesien het om hierdie fikse en aktiewe sportman vir die res van sy lewe te sien ly en hulpeloos wees nie?
DIE WAARHEID
Zappa se skuldgevoelens oor die fratsongeluk het hom nie net van binne af opgevreet nie, maar sy nagmerrie het vererger toe Simon hom gesmeek het om hom te help om die dodelike dwelm in die hande te kry, vertel Runaldo. “Zappa kon nie glo Simon, die pa van twee kinders en pasgetroud met sy groot liefde Lulu, rig so ’n onredelike versoek aan hom nie,” sê hy.
“Schalk (Johan Scholtz), HUB van die Stryders, het ná die slegte nuus oor Simon se verlamming Simon verseker hy kan steeds in die toekoms die span afrig. Zappa het gedink Simon het nog vooruitsigte vir die toekoms, al hang daar ’n donker wolk oor hom.”
Zappa het op ’n manier tog aandadig gevoel vir Simon se verlamming, al was dit ’n fratsongeluk en al het Simon hom vergewe. “En toe gee hy maar in om Simon te help,” verduidelik Runaldo.
Maar dis nie lank nie of Zappa besluit hy kan nie langer met die groot leuen saamleef nie. Hy skraap sy moed bymekaar en vertel Lulu hy het Simon gehelp om selfdood te pleeg.
“Lulu is geskok om te besef dit was Zappa, want hy was baie na aan Simon. Sy sukkel om vrede te maak dat dit eintlik genadedood was en sy jaag Zappa weg. Sy voel Zappa was die een wat haar groot liefde van haar weggeneem
het.,” vertel Ansu. “Maar sy kom dan tot inkeer en besef mettertyd dit was eintlik Simon wat ’n swaar las op Zappa se skouers geplaas het en besluit om Zappa te vergewe. En sy belowe Zappa sy ontboeseming oor sy aandeel in Simon se selfdood sal tussen hulle bly.”
Ansu sê Simon was die groot liefde in Lulu se lewe. “Dit gaan vir haar baie moeilik wees om aan te pas, wat nog te sê om in die toekoms aan te beweeg. Maar sy weet sy moet vir haar twee kinders se onthalwe sterk bly en Simon se gedagtenis laat voortleef.”
VERLEDE KEER
Zappa het Simon in die hospitaal besoek, Pine en Kristien het besef hulle lei mekaar in die versoeking, en Ryno en Anastasia moes belangrike besluite oor die toekoms neem.
IN DIÉ UITGAWE
Bibi en Jordan se paaie skei finaal, SpeurdersersantBreytenbach ondervra Zappa, en Ryno en Anastasia speel lekker huishuis. Die hele Stryder-familie kom in Pottie’s bymekaar, Amanda oorreed Candice om met die onderhoud voort te gaan, en Pine kan Kristien nie uit sy gedagtes kry nie. Candice voer ’n onderhoud met Ryno en Anastasia, Zappa vertel Lulu die waarheid, en Bibi se hart is aan skerwe. Lulu vergewe Zappa, Jana maak kontak met ’n ou vriendin, en Anastasia sukkel om haar nuwe realiteit te verwerk.
Jana se skoolvriendin kom kuier, en Pine neem ’n drastiese besluit. Die waarheid oor Amanda se aanval kom op die lappe, die Stryder-vroue maak gereed vir hul volgende onthaal, en Kris-tien vind uit van Pine se planne. Kristien wil hê Amanda moet weer afgedank word, Jana voel Schalk en Riana sluit haar uit, en Anastasia voel oorweldig deur al die aandag. Schalk en Amanda het ’n ernstige gesprek, Jana besin oor haar vriendskap met Riana, en ’n ongemaklike gerug bedreig Anastasia se reputasie. Die nuus oor Amanda se aanval word aan die pers uitgelek, Ryno wroeg oor die toets, en Buks en Nesie oefen die salsa. Schalk gee vir Jana en Riana ruimte, Fafa moet leer salsa en Pine en Kristien worstel met hul gevoelens vir mekaar.