TrollsTopia
Seisoen 1 e.tv (*194) 15:20 Animasie
Craz-e voeg ’n splinternuwe prettige animasiereeks by sy daaglikse skedule: Die trolle met die wilde hare in die musiekreeks TrollsTopia. “Ons het hierdie blink idee gekry vir ’n reeks oor trolle saam met al die flieks wat ons gemaak het,” sê die medeskepper Matthew Beans (wat ook een van die reeks se skrywers is). “Ons was bekommerd oor Covid-19 toe ons aanvanklik beplan het om die reeks in 2020 uit te reik, maar ons het wêreldwyd skeppende spanne gebruik om dit af te handel. En nou is ons by seisoen 6!”
TrollsTopia gaan oor koningin Poppy (stem: Amanda
Leighton, die stem van Blossom in die nuwe animasieweergawe van The PowerPuff Girls van 2016 tot 2019 en Emma in die dramareeks The Fosters) en haar nuutste persoonlike projek. “Sy het gedroom sy vind ander trolstamme en skep ’n wonderlike wêreld waar hulle almal in vrede kan saamleef,” sê Amanda. Maar dit is nie so maklik nie, voeg die 28-jarige aktrise by. “Musiek is belangrik vir die trolle en dis hoe hulle met mekaar ‘praat’, en Poppy wil hê almal moet saam sing. Maar die rock-trolle wil ’n bietjie chaos veroorsaak. Hulle wil hul eie ding doen.”
Die vervaardigers het seker gemaak die musiek sal in die teikengehoor van 6 jaar en jonger se smaak val. “Ons het Alex Geringas aanboord gekry as komponis en liedjieskrywer,” sê Matthew. “Alex het pryse gewen saam met popsterre soos Kelly Clarkson (’n beoordelaar in die realiteitreeks The Voice) en hy’t vir ons ’n paar ongelooflike liedjies vir die reeks gegee, hulle het selfs die musiek-trefferlys gehaal. Met DreamWorks Studios as animeerders, ons stemakteurs en Alex se klankbaan, het ons ’n treffer.”