Spin vir my ’n storie
Haal die angel uit terug-skool-toe met DStv se reekse vir kinders van alle ouderdomme.
Gespanne kinders wat onder druk is? Dis tyd vir ’n bederfie. Jou kleinspan kan hierdie maand en volgende maand uitsien na avonture, nuwe vriende en nuwe idees op DStv. Enigiemand kan ’n held wees en ’n storie vertel, van die oulikste spinnekoppie ter wêreld tot ’n TV-behepte seester, ’n avontuurlustige kat, twee kinders wie se bestie ’n sneeumonster is, en tieners wat hul eie grafiese romans en speletjiekanale op YouTube wil skep. En daar is lessies vir alle ouerdomme en stadiums.
Lees verder vir meer oor hierdie komende reekse en ’n lys van ander programme wat nou op DStv-skerms begin, insluitende reekse met splinternuwe episodes wat hul storie voortsit. En onthou, jou kinders kan dalk van hul gunsteling-karakters ontmoet wanneer hulle speel en leer met DStv Island Adventures, gratis aan alle ouers via die MyDStv- app.
LUCAS THE SPIDER
Die animeerder Joshua Slice se oulike YouTube-karakter, Lucas die springende spinnekop, het nou sy eie TV-reeks met ’n paar nuwe vriende wat saam met hom op sy avonture gaan. Die reeks is toegespits op allerbelangrike maatskaplike lesse – met nadruk op deernis en empatie – maar dit help ook sy jong gehoor om nie so bang te wees vir spinnekoppe en ander kruipende insekte wat hulle in hul tuiste kan raakloop nie. En omdat dit alles in ’n gewone mensgrootte huis afspeel, is daar die bekoring van gewone alledaagse plekke en voorwerpe uit die oogpunt van die spinnekoppie wat kan rondspring van die vloer na die tafel, die muur en plafon, en in die dag en nag in die huis rondkruip. Dit is geskik vir kinders van drie jaar en ouer.
• Kyk Lucas The Spider seisoen 1, Maandae om 07:15 op Boomerang (*302).