Mooi stories en musiek
Pedro neem kykers op bekende gaste se nostalgiese lewensreise.
Klavierkuiers Met Pedro
Seisoen 2 Donderdae SABC2 (*192) 19:00
Die vermaaklikheidskunstenaar Pedro Kruger weet nie net hoe om ’n klavier te tokkel nie, maar het ook die vermoë om gehore te vermaak en onderhoudend met mense te gesels. Sy reeks Klavierkuiers Met Pedro het groot aftrek gekry toe die twee seisoene onderskeidelik in 2017 en 2018 op die kanaal VIA uitgesaai is. En nou is die tweede seisoen van die reeks Donderdae op gratis-TV (SABC2) te sien vir die wat die eerste sarsie vermaak en inspirerende stories misgeloop het.
TYDLOSE NOSTALGIE, VERMAAK
Wanneer joernaliste Pedro as jong kunstenaar gevra het soos wie hy eendag wil wees, was sy naïewe antwoord dadelik: “Oprah!” “Ek was altyd dol oor mooi stories, maar ek wou soos Oprah Winfrey menslikheid, respek en kindness aan ander mense oordra,” onthou hy. “Klavierkuiers is seker nie so glamorous soos Oprah se program nie, maar ek het darem die geleentheid gekry om my eie kletsprogram aan te bied,” sê hy.
Hy het uit die staanspoor probeer om Klavierkuiers Met Pedro tydloos te maak. “Ek vier die gaste se lewe in foto’s en musiek en vra byvoorbeeld nie op die program waarmee hulle tans besig is nie. Die reeks het dus nie ’n raklewe nie. Al is die tweede seisoen vier jaar terug geskiet, bly dit steeds relevant omdat die kollig meesal op die gaste se lewensverhale en stories uit hul verlede val.”
Daar wag ook heelwat verrassings in elke episode. “Ons het foto’s van die gaste uit hul verlede gekry waaroor van die gaste self verbaas was. Daar’s ook dikwels ’n ‘verrassingsgas’ op die program van wie die hoofgas nie vooraf weet nie,” verduidelik hy. “Die ateljeegehoor is baie klein wat dit intiem en persoonlik maak.” Wanneer die gas ’n liedjie uit sy of haar verlede opdiep, speel Pedro, ’n klaviermaestro, dit spontaan op die klawers en hy en die gas sing dit dan onvoorbereid saam tot groot vermaak vir die kyker.
UITGESOEKTE GASTE
Pedro het sy gaste vir die reeks met sorg gekies. “Die gaste is almal mense wat ek as mens en kunstenaar respekteer.” Van die gaste in seisoen 2 sluit in Danie Niehaus (episode 7, 26 Mei) en die sangeresaktrise Elzabé Zietsman (episode 8, 2 Junie). “Dit is bykans onmoontlik om een van die programme uit te sonder, want elkeen se storie is spesiaal. As ek wel een hoogtepunt moet noem, sal dit die sangeres Anneli van Rooyen
(episode 13, 17 Julie) s’n wees. Anneli se veggees en haar stryd met die chroniese toestand trigemenale neuralgie wat in 2004 by haar gediagnoseer is, is baie inspirerend.”
Hy wou die reeks ook outentiek hou. “Ek wil hê die kyker moet my ervaar soos ek in die regte lewe is en ek hoop dit kom so oor. Dieselfde geld vir die gaste op die program: Ek het hulle mooi laat verstaan Klavierkuiers Met Pedro is ’n viering van hul menswees, sonder skandes of skades. Die deeglike navorsing en inhoud van Hennie van Greunen het hiervoor gesorg,” verduidelik hy.
Kykers leer ook die ware mens agter die kunstenaar ken. “In episode 12 sien hulle byvoorbeeld ’n ander kant van die rocker Francois
van Coke. Dit is ook goed dat stories en lewensverhale van die kunstenaars gedokumenteer word vir komende geslagte, en terwyl hulle nog daar is.”
GEBORE VIR DIE VERHOOG
Die boytjie van Brackenfell, soos Pedro allerweë genoem word, se musiektalent het as kind al deurgeskemer. “Ek het op skool fluit as vak geneem, maar nooit amptelik klavierlesse nie. Wanneer ek ’n liedjie oor die radio gehoor het, kon ek net daarna voor die klavier sit en dit uitfigure en dan speel,” vertel hy. Dit het hom natuurlik baie goed te pas gekom toe hy vir jare spanleier in die gewilde speletjieprogram Liriekeraai (van 20002009 op kykNET) was.
Pedro se eerste formele verskyning op die verhoog was egter nie agter die klavier nie, maar as akteur in die verhoogproduksie Fiela Se Kind toe hy 14 was. Hy het die rol van klein Benjamin vertolk. “Ek het toe besef die vermaaklikbedryf is heel moontlik waar my toekoms lê,” vertel hy.
Hy het op skool ook in die Tygerbergkoor gesin en ná matriek het hy “vinnig” drama aan die Universiteit Stellenbosch gestudeer, sê hy skertsend. Pedro en Hennie van Greunen, sy lewensmaat en sakevennoot, loop al 30 jaar ’n kreatiewe en persoonlike pad saam.
Hennie is die skrywer van verskeie treffer- en bekroonde verhoogproduksies van Pedro soos Blougat, Lyf, en Junkiedrome, asook vervaardiger en regisseur van produksies soos Shirley Valentyn, Die Naaimasjien en Rondomskrik.
PLOEG TERUG IN BEDRYF
Die twee kunstenaars bestuur sedert 2018 Curro Create, ’n inisiatief wat hul maatskappy Wordsmith’s Theatre Factory saam met die privaat skoolgroep Curro bedryf. “Ek en Hennie het gevoel ons wil ná soveel jare in die bedryf ons ondervinding terugploeg en ’n verskil in jong mense se lewe maak, en terselfdertyd ook in hul toekoms belê. Ons het ’n span van sowat 80 beroepskunsenaars wat as mentors by skole van die Wes-Kaap tot Gauteng sowel as Botswana en Namibië optree. En terselfdertyd is dit ook werkskepping vir hierdie beroepskunstenaars,” sê hy.
Tydens die projekte word die leerders in alle kreatiewe dissiplines binne die bedryf, van kuns, fotografie, toneel, dans, sang tot die sosiale media en film gementor.
“Die musiekblyspel From Broadway To Bird Street, wat in 2020 onder meer by die US Woordfees in Stellenbosch opgevoer is en later op kykNET te sien was, was ’n suksesvolle projek van Curro Create.
Pedro sê sy lewensfilosofie is om altyd die beste weergawe van homself vir sy naaste te wees. “En om egoloos die lig op ander te laat skyn,” voeg hy by. “Ek glo nalatenskap moenie wees wat jy vír ander nalaat nie, maar wat jy ín hulle nalaat.”
En sonder twyfel vervolmaak Pedro sy filosofie met al die nodige passie, talent en energie.