Strangest Things
Seisoen 1 History (*186) 19:25 Dokkie
TV-programme en flieks skep magiese en mistieke voorwerpe om stories oor te dra. Maar wat as sulke voorwerpe werklik bestaan? Corey Johnson (Chairman Burrell in die spioen-dramareeks Deep State) is die verteller van Strangest Things en verken ongelooflike voorwerpe wat reg oor die wêreld ontdek is. “Hulle is onbeskryflik. Daar’s iets omtrent dié voorwerpe wat kenners in hul veld dronkslaan, hulle sukkel om te verduidelik wat hulle ontdek het,” sê Corey.
In episode 1 ondersoek argeoloë en mineraalprofessore ’n skarabee-gelukbringer versier met juwele wat in 1922 deur die ontdekker Howard Carter in die Egiptiese seunsfarao Toetankamen se grafkelder gevind is. “Dis merkwaardig,” sê Corey, en voeg by “dié heilige kewer is nie net van goud gemaak nie – dit bevat ’n meteoriet wat honderdduisende jare oud is. Hoe het die antieke Egiptenare dié gesteente verstaan en waarom het hulle dit in dié heilige juweliersware gebruik?” Daar is ook inskripsies op ander voorwerpe in die grafkelder wat in geen bekende taal is nie. Waar het dit dus vandaan gekom?
Die dokkiereeks is nie net tot die antieke wêreld beperk nie – daar is meer onlangse ontdekkings soos ’n ysterhand uit die Middeleeue en die raaiselagtige koderingsmasjien uit die Tweede Wêreld-oorlog wat ’n mens nie sonder die korrekte masjiene kan ontsyfer nie. “Wanneer ’n mens na dié voorwerpe kyk, besef jy hulle was ver voor hul tyd in die geskiedenis,” sê Corey. Hy verklap sy gunsteling-voorwerp in Strangest Thing is die Romeinse dodekaëders in episode 2. “Dis 12-vlakkige koperallooi-voorwerpe met ’n hol binnekant. Ons het meer as 116 daarvan van Spanje tot Holland en Engeland gevind, vreemd genoeg nie in Rome nie. Ons weet nie wat hulle doen nie; waarvoor dit gebruik word nie. Maar hulle is so koel!”