In mokumentêre styl!
Is jy lus vir lag met ’n klein bietjie drama bygemeng? Showmax het vyf groot mokumentêre reekse wat satire tot die hoogste vlak voer.
Is jy moeg van die lewe se stres? Satire is jou oplossing op die stroomplatform Showmax met hul keuse van vyf mokumentêre programme wat jou sal laat snorklag. Vanaf eienaardige vampiere tot musikante wat teëspoed ervaar en die verstrooide Tali wat ’n troue en moederskap aanpak, mokumentêre reekse is die beste ding om nou te kyk. En begin sommer plaaslik . . .
HOTEL SEISOEN 1-5
Dié Afrikaanse reeks speel af in die fiktiewe Fransen-hotel, en niks is soos dit lyk nie – veral die eksentrieke huishoudster wat alles in die hotel doen – sy’s ’n vrou van twaalf ambagte en slaag in die meeste daarvan.
Die bestuurder Ferdie (James Borthwick, Leonid Brezhnev in die Britse periodedramareeks The Crown) is ’n rustige baas en hoewel hy wil hê die hotel moet floreer, laat hy die personeel die vuilwerk doen terwyl hy agteroorsit en die geld tel. In seisoen 1 word Die Fransen verkoop aan die Lourier-hotelgroep en Thomas (Beer Adriaanse, aanbieder van die Afrikaanse speletjiesprogram Slim Vang Sy Baas) word vanaf die hoofkantoor gestuur om die oorgang te monitor. Thomas word gou ’n heeltydse werker by die hotel, en hy het ’n aan-af-verhouding met die bekkige ontvangsdame Jony (Simoné Pretorius, Krizanda in die dramareeks Swartwater).
Moenie die spesiale onderhoude met die portier Danny (die komediant Schalk Bezuidenhout), die kelnerin Malanie (Mila Guy, Zee in Binnelanders, lees meer op ble. 28, 29 en 43) en die wildopsigter Brenda (Martelize Kolver, Liefie in die sepie 7de Laan, lees meer op ble. 30 en 31) waarin hulle meer vertel van die verfilming van Hotel misloop nie.