Wreed & verwronge
’n Nuwe reeks oor ware misdaad begin vandeesmaand op CBS Justice (*170), en fokus op die gevoelloosste moordenaars wat al ooit vasgetrek is. Hier is ’n kykie na die episodes waarna jy in seisoen 1 van Twisted Killers kan kyk . . .
Niemand weet werklik wat dryf iemand daartoe om ’n algehele vreemdeling te vermoor nie, maar dit gebeur ongelukkig die heeltyd. Gelukkig word die mense dikwels vasgetrek, grotendeels danksy wenke van die publiek, toegewyde polisiewerk en intense ondersoeke om hulle op te spoor. Twisted Killers op CBS Justice (*170) ondersoek moordenaars en hul sinnelose misdade, insluitende:
THE SHOTGUN KILLER
Almal in die deelstaat Indiana was aan die einde van 1990 twee maande lank op hul senuwees, want iemand het sy inwoners doodgeskiet en besteel . . . en die polisie kon hom nie vang nie. Wie is volgende? Die eerste slagoffer was ’n petroljoggie, wat van naby met ’n 12-kaliber geweer geskiet is.
Die tweede een was ’n ontvangsklerk by ’n motel, wat op presies dieselfde manier vermoor is. Volgende was twee broers wat in hul kleremakerswinkel gewerk het. Danksy die oortreder se bekentenis van sy optrede aan ’n kennis het die polisie uiteindelik ’n leidraad gehad en Christopher Peterson is kort daarna in hegtenis geneem nadat die afgesaagde geweer in sy huis gevind is. Maar het Peterson werklik die moorde gepleeg? En was daar meer slagoffers? Die hofsaak word ingewikkeld, veral wanneer ’n getuie die moordenaar baie anders as Peterson beskryf. Het hulle die regte man?
THE LEAF KILLER
Wanneer Tina nie by haar werk by die plaaslike Dairy Queen in Mount Vernon, Ohio, opdaag nie, ondersoek die polisie dadelik die saak. Wat hulle gevind het, was soos geen ander misdaadtoneel ooit nie en word beskryf as een van die ergste moordsake in Ohio se geskiedenis. Tydens ’n besoek aan Tina se huis was daar bewyse van bloed wat die ondersoekers laat dink het al vier die inwoners is vermoor, hoewel geen lyke gevind is nie. Deeglike polisiewerk en ’n ongelooflike leidraad het hulle geneem na die skuldige se huis waar hulle iets verrassends gevind het: Die huis was tot oorlopens toe vol blare. Hulle skat daar was honderde sakke. Soos hulle hul weg deur die gemors gebaan het, was daar nóg ’n verrassende ontdekking in die kelder – een van die slagoffers het nog geleef.
HOUSE OF HORRORS
Rhode Island is die kleinste deelstaat in Amerika. Dis ook die stilste en baie ouwêrelds met pragtige natuurskoon, historiese geboue en wonderlike wit strande. Dié kusstaat is beslis nie sinoniem met moord nie en toe drie vroue dus in 2003 in die dorpie Woonsocket verdwyn, was ’n reeksmoordenaar die laaste ding wat enigeen vermoed het. Die verdwynings het saamgeval met ander voorvalle van geweld, insluitende ’n vrou wat gesteek is en nóg een wat met ’n metaalpyp geslaan is. Die ontvoerings en aanvalle het gebeur in ’n gebied wat gereeld deur prostitute besoek is en die polisie het dus hul ondersoek daar toegespits. Kort daarna het hulle van nóg twee aanvalle gehoor – wat hulle tot ’n hoogs geor- ganiseerde reeksmoordenaar gelei het.
Kyk Twisted Killers seisoen 1 weekdae