Wantroue, egbreuk
Zoe val flou en kry onverwagte nuus.
oe Lauren Joseph) en Tim Marco Spaumer) se huwelik is tans wankelrig. Zoe se vertroue in Tim is geknou nadat hy haar in Mei met ’n flerrie by ’n hotel verneuk het. Tim het die aand by die hotel geslaap nadat hy en Zoe ’n hewige stryery gehad het omdat Zoe met haar tannie Brid
gette (Denise Newman) en Tim se baas saamgestem het om Tim se droomkuseiendom wat hy wou ontwikkel, te verkoop. Die eiendom is in Zoe en Bridgette se oë bevlek omdat Tim die vorige eienaar laat vermoor het om dit te kry. Bridgette wou alle spore doodvee wat na haar, haar besigheid en die eiendom lei, deur dit te verkoop. Tim was briesend oor die besluit, maar dis die minste van sy probleme want Zoe wil skei. En selfs wanneer sy iets belangriks uitvind, twyfel sy of sy met Tim wil versoen.
’N NUWE PERSPEKTIEF
Zoe is moedeloos en seergemaak, maar stem in wanneer Tim voorstel hulle kry huweliksberading en haar smeek om nie hul huwelik weg te gooi nie. “Sy weet dit gaan moeilik wees om haar vertroue in Tim te herstel, maar huweliksberading kan dalk aan hulle albei ’n nuwe perspektief gee oor hul verhouding,” sê Lauren.
Bridgette is ongelukkig oor Zoe se instemming en wil haar van plan laat verander. “Zoe weet Bridgette wil net die beste vir haar hê,” sê Lauren. “Maar dis vir haar belangrik om haar huwelik te probeer red. Sy kan nie net opgee op Tim nie, want sy is lief vir hom.” Denise sê dis ’n bitter pil vir Bridgette. “Maar sy sal Zoe ondersteun.”
LOER OOR JOU SKOUER
Zoe probeer aanbeweeg met die hoop die berading sal dinge verbeter, maar die booswig
Nazeem (Irvine van der Merwe) maan Zoe om versigtig te wees. “Nazeem sê vir Zoe sy gaan vir altyd oor haar skouer loer want ’n man soos Tim verander nie sommer nie –
once a cheater, always a cheater,” sê Lauren. Dit ontstel Zoe baie al weet sy sy moet haar nie aan Nazeem steur nie. Haar paranoia neem oor en sy bevraagteken alles wat Tim doen of waarheen hy gaan en dink hy verkul haar. Sy gee Tim die koue skouer wanneer hy intiem wil wees. “Tim voel gekwes deur die verwerping sê,” Marco. “En hy besef sy verhouding gaan nie so maklik herstel soos hy gehoop het nie.”
HOU BY JOU BESLUIT
Zoe is emosioneel en verward, en die moederlike Mymoena (Jill Levenberg) gee vir haar huweliksraad. “Mymoena se huwelik is self deur troebel water toe haar man, AB (Cedwyn Joel), vir Farah (Lee-Ann van Rooi) as sy tweede vrou (in 2020) geneem het – sy weet dus hoe dit voel om heeltemal vertroue in jou man te veloor,” sê Lauren. “Sy sê vir Zoe dit was vir haar moeilik om AB net terug te vat, maar dit was haar keuse en sy het daarby gehou, en net so moet Zoe haar keuse maak en daarby hou.” En met Moena se raad in haar gedagtes, bestee Tim en Zoe die aand saam.
ZOE SIEN ROOI
Dit lyk asof dinge beter gaan tussen Zoe en Tim, maar wanneer Zoe ’n foto van ’n vreemde nommer kry van Tim wat saam met ’n ander aantreklike vrou ’n drankie drink, wil sy ontplof! “Zoe track Tim op sy foon en sien hy het weer ’n draai by ’n hotel gemaak,” sê Lauren.
Later die dag kry Zoe Tim en die vrou by die kantoor en sy braak gal oor Tim wat haar verneuk. “Sy sien rooi, maar kry dadelik skaam wanneer Tim verduidelik die vrou is die dogter van een van hul belangrike kliënte en sy verteenwoordig haar ma in ’n groot projek. Tim het die projekte met haar bespreek.”
Tim vlieg Zoe die volgende dag in oor haar gedrag voor die kliënt. Zoe erken sy het ’n fout gemaak, maar wys aan
Tim sy aandeel daarin uit: Sy vertrou hom nie meer nie. En daarom wil sy skei.
’N VERRASSING
Tim trek uit die huis uit en Bridgette kry uiteindelik die kans om Tim te vertel presies wat sy van hom dink. “Sy sê hy is ’n tweegatjakkals, ’n leuenaar en ’n egbreker en Zoe verdien beter as hy,” sê Denise.
Intussen eis die spanning sy tol op
Zoe en sy val flou op kantoor. Die dokter ondersoek Zoe en tot haar verligting is niks ernstigs fout nie, maar . . . “sy is swanger!” verklap Lauren. “Dit gee Tim ’n sprankie hoop dat hul huwelik dalk ’n nuwe bestaansreg gaan kry,” sê Marco, maar ’n baba gaan nie skielik al hulle probleme laat verdwyn nie.