O WEE! (TROU-OOMBLIKKE)
Die afgelope twee weke was ’n wipwarit in Hillside. En indien jy jou oë geknip het, het jy dalk van die verbysterende drama misgeloop. Hier is ’n paar van die hoogtepunte:
1 Enkele dae voor die troue het Bonita begin twyfel. “Veral sedert DeWet weet sy geliefde Bonita was betrokke om Lana (Mila Guy), die ma van Shawn se ongebore baba – DeWet se kleinkind – te help om te ontsnap en dat Bonita die besonderhede van Shawn se dood geken het,” vat Hildegardt dit saam.
“Die grootste uitdaging wat DeWet en Bonita nou in die gesig gestaar het, was die skielike waarheid wat onthul is oor Shawn se dood – ’n kurktrekker van ’n sjampanjebottel wat Rickus oopgemaak het, het Shawn se kop getref en hy het inmekaargesak,” voeg Hildegardt by. “In ’n sekere mate het Bonita koue voete gekry. Sy het openhartig met Vanessa gepraat oor die verkeerde besluite neem, oor verhoudings en trou. Sy het haarself bevraagteken of dié dalk die regte een was,” sê sy. Nie dat dit nou ’n verskil sou maak nie – hulle is reeds ’n jaar lank getroud! 2 ’n Mens bedrieg nie vir DeWet nie. En dis presies die fout wat Koedoe gemaak het. Op Bonita en DeWet se troudag, kon sy strooijonker, Chris (hou ’n ogie op jou vyande), hom nie kry nie. “DeWet het sy ma in ’n ouetehuis gaan besoek en foto’s van Bonita saamgeneem om hulle ‘aan mekaar bekend te stel’, maar Chris was paniekerig en het sy vriendin Koedoe – wat ’n dubbele agent vir DeWet vir
Chris was [as Chris se spioen om hom op hoogte te hou van DeWet se bewegings] – gebel om DeWet se selfoon na te spoor. DeWet het na die dakwoning teruggekeer en Chris daar ontmoet om na die trouplek te gaan, maar eers het hy ’n geleentheid gekry om na die stempos tussen Chris en Koedoe te luister. Dit het Koedoe se verraad teenoor hom bevestig,” onthul Dirk.
3 Toe die troue uiteindelik begin, was dit nie Bonita wat na die kansel gestap het nie, maar ’n vrou in ’n swart rok en sluier! Kort voor die troue is Bonita toegesluit in ’n hotel deur niemand anders nie as Erika (Corine du Toit), DeWet se eksvrou en Shawn se ma. En Erika was vasberade om die troue in ’n roudiens vir hul seun te verander.
Voor sy die bruid toegesluit het, het Erika vir Bonita gesê DeWet sou met haar afreken. Bonita was oortuig DeWet gaan wraak neem omdat sy Lana gehelp het en die Welmans se betrokkenheid by Shawn se dood geheim gehou het. “Bonita het gedink DeWet wou haar doodmaak, dus het sy haar eks, Tony (Marlo Minnaar), gebel vir hulp en sy was op pad na die lughawe om te ontsnap. Maar DeWet het haar opgespoor, dinge opgeklaar, sy liefde aan haar verklaar en haar verseker hy sal haar nie seermaak nie,” sê Hildegardt.
4 En ’n spesiale vermelding aan die gaste wat by die verkeerde onthaalplek opgedaag het weens ’n tikfout op die uitnodiging. Die helfte van die gaste hy by Ivy (Nazli George) se kerk beland, terwyl die troue by ’n gehuurde plek was.