Agter Tralies
Seisoen 3 VIA (*147) 20:30 Ware Stories
Daar is lewe ná tronkstraf. Dís die kernboodskap in die reeks oor ware stories Agter Tralies waarvan seisoen 3 op VIA begin. Die oud-misdadigers wat in die reeks hul stories vertel, is dapper, want dis nie maklik om jou foute te erken en jou lewe te herbou nie, maar dit inspireer kykers weekliks.
In seisoen 3 maak kykers kennis met verskeie mense wat aan moord, bedrog, diefstal en dwelmsmokkelary skuldig bevind is. “Ons doen deeglik navorsing om seker te maak ons inligting is akkuraat, en ons gee die gas die kans om sy storie in ’n veilige omgewing te vertel,” sê die vervaardiger Meggan Raubenheimer.
Agter Tralies werk saam met nie-winsgewende organisasies, maatskaplike werkers en kerke wat bande smee met gevangenes wanneer hulle uit die tronk kom en help om hulle te rehabiliteer. “As dit nie vir dié organisasies was nie, kon ons nie die reeks maak nie,” sê Meggan.
In episode 1 vertel Glen Meyer (41) sy verhaal van hoe hy in 1997 op die ouderdom van 18 by dwelms betrokke geraak het wat tot sy tronkstraf vir moord gelei het. “Ek was in die kloue van ’n sindikaat en terwyl ek self dwelms gebruik het, was ek ook ’n debt collector vir die sindikaat,” sê Glen wat tans sy eie nie-winsgewende organisasie bestuur. Dinge het te veel geraak en Glen het homself aan die polisie oorgegee. Om meer daaroor uit te vind, moet jy inskakel en kyk – dis skokkend, maar bemoedigend.
In episode 2 vertel Caren
Jacobie (54) haar storie van kredietkaart-bedrog en hoe die dwelmduiwel haar ook beetgekry het. “Dit het jare geduur om my lewe reg te ruk,” sê Caren. “Maar nou is ek skoon, en het my eie take-away- winkel.” Daar is hoop ná misdaad. “My storie is eg en rou en ek hoop dit bring verandering,” sê Glen.