Dinner Date
Seisoen 11 BBC Lifestyle (*174) 18:00 Realiteit
Wat die Britse afspraak-realiteitsreeks Dinner Date anders maak, is die slim samevoeging van kos en romanse. ’n Enkellopende kry aan die begin van elke episode vyf driegang-spyskaarte om van te kies, wat deur potensiële metgeselle saamgestel is. Die enkellopende bestudeer die spyskaarte en gee sy of haar mening oor die soort mens agter die geregte. Die spyskaarte wat gekies word, is gewoonlik verregaande of bevat geregte soos two To Mangosalmviskoekies as ’n voorgereg, let’s get it Mediterran-e-on- slaai as hoofgereg, en apple-ing apple crumble- nagereg. Die enkellopende deelnemer kies uiteindelik die drie spyskaarte wat ’n indruk maak en besoek die drie kokke kort daarna om die ete-afspraak by hul huis te hê. Aan die einde van die week gaan die enkellopende en die wenner op ’n ete-afspraak by ’n spogrestaurant en die twee verloorders kry ’n wegneemete by hul huis. “Ons gee een gelukkige persoon die kans om liefde te vind deur die loop van drie maaltye, hoe romanties kan dit wees?” sê Sarah Tong, wat die direkteur van verkope is by Hat Trick International, die maatskappy wat Dinner Date vervaardig.
Om dinge in seisoen 11 ’n ekstra geurtjie te gee, is glans-gaste ook as enkellopendes in sommige episodes te sien, soos die barbier en realiteitTV-ster Dale Mehmet, wat in 2021 aan seisoen 7 van die afspraakreeks Love Island deelgeneem het, en die TVster Lauren Simon wat welbekend is vir haar verskyning in die realiteitreeks The Real Housewives Of Cheshire. “’n Bietjie beroemdheid doen nooit skade nie,” sê Sarah, en voeg by: “Die sterre gee ’n tikkie roem aan ons gewilde reeks.”