Werner op die pad
Tussen ’n storm losdans met oumas en jive met aanhangers, is kykers dolverlief op Zak Hendrikz.
Werner Visagie (gespeel deur Zak Hendrikz) is ongetwyfeld een van die mees geliefde karakters in Hillside. “Werner is ’n prettige, deernisvolle ou wat ’n liefdevolle man vir sy vrou, Tanya (Liezl de Kock), is, en ’n morele kompas vir sy seun, Uys (Daniel Coetzee). Werner glo ’n mens moet gaaf wees teenoor jou naastes, ongeag ras, seksualiteit of sosiale status. Hy glo daarin om altyd die regte ding te doen, maak nie saak wat die gevolge is nie,” verduidelik Zak, wat eers in Desember 2021 by 7de Laan aangesluit het.
MOVING IN
Zak erken hy was senuweeagtig op sy eerste dag op die stel. “Dis altyd skrikwekkend om in ’n sepie te begin speel. Jy weet nooit of jy oor die weg gaan kom met jou medespelers nie en dit kan problematies op die skerm wees. Maar in dié geval is Liezel en Hannelie Warren – Werner se ma, Augusta – uitmuntende aktrises saam met wie ek al in die verlede gewerk het. Daar was dus ’n onmiddellike band. Die baie liefde en lag is die beste deel van werk toe kom,” sê Zak. “Dit is die eerste karakter in my loopbaan met wie ek kan identifiseer. Ek het baie van my eie ervarings en persoonlikheid gebruik om Werner kleur te gee, daarom het ek ’n sagte plekkie vir hom.”
PRET MET DIE KYKERS
Nóg ’n deel van sy werk waarvan Zak nie genoeg kan kry nie, is om promosietoere te doen en met die lojale kykers bande te smee. “My eerste 7de Laan-promosietoer was in Maart na Kaapstad. Die spelers het nie net op ’n dieper vlak met mekaar bande gevorm nie, dit was fassinerend om te sien hoe die kykers werklik glo in die storie en karakters wat ons uitbeeld. Ons karakters word deel van hul uitgebreide familie en hul liefde en warmte, is ’n seën,” sê Zak. “Daar was ’n 92-jarige vrou wat op die verhoog geklim het. Sy het broos gelyk en het hulp benodig, maar ons het jolig op die verhoog gedans! Sy het gejive soos ’n 16-jarige!” Een ding waaroor Zak stilbly, is sy huwelikstatus veral wanneer aanhangers vra of hy en Tanya werklik getroud is. Daarop glimlag hy skaam en knipoog.
VERLEDE KEER
Ivy het die verkeerde aanname oor Werner gemaak, en Zee het ’n spook gesien terwyl sy die baba opgepas het. Romeo, Khethiwe en Vanessa het teen die trane baklei toe Karmen vir Tjattas ’n stempos gelos het, en Shady het met kos probeer werk.
IN DIÉ UITGAWE
Die inwoners van The Hillside Heights is bly om te hoor van verbeteringe aan die gebou, en DeWet se vrese word besweer wanneer hy nuus kry van Rickus en Lana. Augusta het ’n waarskuwing vir haar kleinseun oor inmeng in sy ouers se sake, en Denzil het ’n vernuwende idee om met Oppiekoffie se mededingers te wedywer. Tanya praat openhartig met Alexa oor haar huweliksprobleme, en Romeo en Khethiwe is opgewonde oor die danslesse wat hulle kry vir hul troue. Ivy vra Augusta om verskoning omdat sy gerugte oor haar seun versprei het, Marvin gee Werner iets om oor na te dink, en Denzil wil amptelik eienaarskap van Stasie Ses neem.
Tanya en Alexa het albei baie deurgemaak en besluit ’n aandjie uit sal hulle goed doen. Bonita is verward deur Augusta se flankeerdery met DeWet, en die Welman-kinders beplan Chris en Mariaan se 40ste huweliksherdenking. Ivy is beïndruk deur Vanessa se onselfsugtigheid, Romeo en Khethiwe raak paniekerig wanneer hulle Eddie and Karmen, wat hulle opgepas het, nie kan kry nie, en Shady is angstig oor ’n aankondiging.