Fantasy Island
Seisoen 1 Universal TV (*117) 20:00 Drama
Die sci-fi-dramareeks Fantasy Island is wat dit sê: ’n Fantasie wat op ’n eiland afspeel. Eet enigiets sonder om vet te word? Maklik. Bang haaie val jou in die swembad aan? Geen probleem nie. Maar daar’s ’n kinkel in die nuwe weergawe van die reeks uit die 1970’s met Elena Roarke (Roselyn Sanchez, Carmen Luna in die dramareeks Devious Maids) as aanbieder op die eiland. Sy vervul die rol wat deur Ricardo Montalbán (Grandfather in die 2002-fliek Spy Kids 2: Island Of Dreams) bekend gemaak is deur wense toe te staan, en Elena is dol oor die oorspronklike reeks. “Die Latyns-Amerikaanse Ricardo was ’n legende. My karakter is nou ’n familielid van sy karakter. Dis so ’n eer, maar ons doen ons eie ding,” sê die aktrise wat in Puerto Rico gebore is.
Daar is ’n paar veranderinge in die nuwe weergawe van die reeks, vertel Roselyn. “Ons het ’n ligter vibe. Dis nie so gewelddadig nie. Die oorspronklike reeks is hoofsaaklik in ’n ateljee in Burbank, Los Angeles geskiet. Ons verfilm 90% buite, net 10% is op ’n doelgemaakte stel geskiet. Ons het ’n regte strand, natuur, wind, regte alles. Die grondgedagte is soortgelyk, maar jy gaan baie visuele veranderinge sien.”
Elena kan nie alles alleen hanteer nie en het twee helpers. Die loods Javier (John Gabriel Rodriquez, Massak in die fantasiereeks The Vampire Diaries), en Ruby Akuda (Kiara Barnes, Zoe in die Amerikaanse sepie The Bold & The Beautiful) wat ’n gas en nou persoonlike assistent is. Maar dis nie net die gaste wat fantasieë uitleef nie, skimp Roselyn. “Selfs Elena. Almal sal verras wees oor wat sy wil hê, selfs sy!”