Die Staat Teen
Seisoen 2 VIA (*147) 20:00 Ware Stories
Hoewel die misdaadvlakke in die land almal moedeloos maak, is daar darem dapper ondersoekbeamptes en staatsaanklaers wie se missie dit is om geregtigheid te laat seëvier. En dis hul stories wat in Die Staat Teen vertel word.
Seisoen 2 van dié reeks begin vanaand en die sake wat in die kalklig is, gaan jou nekhare laat rys. “Die reeks se fokuspunt is nie die familie en vriende van die slagoffers wat hul traumastories vertel nie. Ons fokus meer op die ondersoekbeamptes en aanklaers – hoe hulle te werk gegaan het om die saak te ondersoek, en hopelik die skuldige aan die pen te laat ry,” verduidelik Jackie Ruth Murray, die vervaardiger van die reeks.
“Die betrokkenes gee ons dieper insig in die proses: Die ondersoek self, die opvolg van leidrade, die versamel van bewysstukke, hoe die verdagte aangekla word, die verhoor en die hofuitspraak.”
In episode 1 kyk ons na die saak van Rob Packman wat sy vrou vermoor, haar in haar motor se kattebak gelaai en die motor aan die brand gesteek het. Episode 2 (18 Julie) fokus op drie Bulgare se dwelmsmokkelary in die Wes-Kaap, en in episode 3 (25 Julie) word Glenville Faro se verkragting- en moordsaak bespreek.
Die is nie vir sensitiewe kykers nie, maar dis wonderlik om te sien hoe hard die betrokkenes werk om die waarheid te vind. “Misdaad en moord is ’n wêreldwye pandemie. Soms maak dit ons taak as vervaardigers moeilik, want ons doen ure en ure se navorsing en lees van die gruwelikste details wat jy nie maklik sal vergeet nie,” sê Jackie. Die produksiespan agter Die Staat Teen ondersteun mekaar wanneer dinge moeilik raak. “Die reeks wys hoe hard ons owerhede werk. En dis wat ons die kykers wil wys: Daar is hoop.”