’n Leerskool in slaapkamersake
Dr. Elna Rudolph en kie. takel kwessies oor seks, intimiteit en veiligheid.
Uit Die Slaapkamer
Seisoen 1 Woensdae VIA (*147) 21:00 (begin 6 Julie)
Dis ’n tameletjie-onderwerp. Dís hoe die onderwyseres en aktrise Adri Vivier (medeaanbieder van die leefstylreeks Ouma Weet Mos) seks in ons eng Suid-Afrikaanse gemeenskappe beskryf. “Dit word nie vrylik bespreek nie en dit laat mense dikwels baie ongemaklik voel.”
Maar in die splinternuwe geselsprogram Uit Die Slaapkamer gaan Adri en twee ander paneellede – die akteur Neels van Jaarsveld (Ben Kruger in die dramareeks Fynskrif) en die sangeres Bianca le Grange – saam met die seksuoloog dr. Elna Rudolph intimiteit in alle aspekte bespreek. Slaapkameronderrig met die beste bedoelings!
’N MIDDEWEG
“In die program vind ons ’n mooi middeweg tussen die speelse en die ernstige,” sê Elna wat ons leer ken het in die geselsreeks Minki met die TV-persoonlikheid Minki van der Westhui
zen, waarin Elna haar eie insetsel oor seksuele gesondheid aangebied het. “Daar is tye wat ons stik van die lag wanneer oor intieme onderwerpe gepraat word, maar die hoofdoel van die program is om Jan Alleman te help om ’n gesonde sekslewe te lei en antwoorde op vrae te gee wat hulle nie noodwendig in die openbaar of selfs vir ’n vriend of geliefde wil vra nie.”
Wat Elna as mediese dokter (en uitvoerende raadslid van die Suid-Afrikaanse Seksuele Gesondheidassosiasie en streeksekretaresse van die Wêreldassosiasie vir Seksuele Gesondheid) in die reeks wil oordra, is inligting gegrond op navorsing om almal te help om hul beste sekslewe te geniet.
DRIE SEGMENTE
Elk van die 13 episodes in die reeks het drie segmente: “Uit Die Spreekkamer is die eerste segment waartydens ons op mediese vrae fokus, soos of seks tydens menstruasie veilig is (episode 2, 13 Julie). In die tweede segment, Seks En My Kind, stuur ouers vrae in en soek raad oor intieme sake en die kleinspan, soos wanneer jou kinders jou dalk op heterdaad betrap (ook in episode 2). En die laaste segment, Uit Die Slaapkamer, handel oor meer intieme vrae, soos hoe om die passie weer in die slaapkamer aan te wakker (episode 4, 27 Julie), of hoe jy seksspeelgoed kan gebruik (episode 6, 10 Augustus),” sê Elna.
DIE PANEEL
“Ek is so excited om deel van die paneel te wees en voel dit is die prefekte tyd in my lewe om so ’n onderwerp te bespreek,” sê Bianca. “Ek het altyd gewonder hoekom seks so taboe is terwyl dit ’n groot deel vorm van wie ons is.”
Elna sê Bianca was ’n verfrissende paneellid. “Sy het my oë oopgemaak vir hoe ’n gemeenskap, soos Eldorado Park in Johannesburg, seks sien en dit hanteer. Wanneer ek byvoorbeeld uit ’n mediese oogpunt wenke gee of medikasie voorstel, sal Bianca uitwys minderbevoorregte mense gaan sukkel om dit te kry omdat geld dikwels min is. Of hul prioriteite is bloot op ander plekke.”
Adri bring ’n alternatiewe siening na gesprekke. “Sy is ’n wyse vrou,” sê Elna. “Haar kennis en ervaring van die wêreld lewer ’n groot bydrae tot die program en hou ons gebalanseerd.”
Neels gee die manlike perspektief en glo kennis is mag. “Hoe meer ons oor die onderwerp praat, hoe beter,” sê hy. Neels beskryf Elna as “’n engel in ’n pen
cil skirt”. “Haar kennis is indrukwekkend. Sy gaan beslis mense help met verskeie moontlike struikelblokke. Die reeks is die kyk werd, want dis vermaaklik, toeganklik, spontaan, opwindend en opvoedkundig,” meen Neels.