Sjarmante heer
Armand wil glad nie soos Dawid wees nie.
Troukoors
Seisoen 1 Sondae kykNET (*144) 20:00
Ons het die akteur Armand Aucamp al in verskeie rolle gesien, van Jan van Riebeeck in die rolprent Krotoa tot die skrywer Tom Niemandt in die treffer-dramareeks Die Boekklub. En nou sien ons hom Sondagaande as die pierewaaier Dawid in die ligte romkomreeks Troukoors op kykNET. “Ek sou nie omgegee het om soos sommige van die karakters soos Tom, wat ek voorheen vertolk het, te wees nie. Maar een ding is seker, ek wil beslis nie soos Dawid wees nie,” bieg hy. “Al is Dawid sjarmant, het hy ’n yslike ego, is boonop chauvinisties en glo ’n vrou moet haar plek ken. Daar is ’n sekere manier om dinge te doen, maar Dawid se manier is beslis nie die beste of regte manier nie. Hy is eintlik alles wat ’n man nie moet wees nie,” voeg hy by.
TOKSIESE VERHOUDING
Die verhouding tussen Dawid en sy meisie, die sprankelende troubeplanner
Jessica (Ilse-Lee van Niekerk) is boonop ’n toksiese verhouding, sê Armand. “Jessica is vir Dawid ’n trofee en sy is pragtig en vervul beslis daardie rol. Hy beskou haar ook as ’n uitdaging om aan sy sy te hê en sien dit eintlik as ’n speletjie,” voeg hy by. Jessica kan haarself aan die begin van die reeks nie so goed laat geld teen Dawid se manipulerende persoonlikheid nie, maar mettertyd begin sy al hoe meer selfvertroue ontwikkel, lap hy so ’n bietjie van die storielyn uit.
VERFRISSENDE REEKS
Armand, wat in Kaapstad woon, vertel hy het nie twee keer gedink om ’n oudisie vir die rol van Dawid te doen nie. “Ek, Louis Pretorius en Albert Snyman, die vervaardigers van Troukoors, stap reeds ’n lang pad – ek het met drie seisoene van Die Boekklub saam met hulle gewerk en hulle is ’n wenspan. Met Troukoors het dit soos ’n tuiskoms gevoel,” sê hy.
Troukoors is wel ’n ander genre as Die Boekklub. “Nina Swart, die regisseur, het die reeks tydens die voorproduksie goed opgesom en gesê dit is so verfrissend en borrelend soos ’n glas sjampanje,” sê hy. “Daar’s beslis plek vir die swaarder dramareekse, maar talle kykers soek ook ligter vermaak.”
Nóg ’n pluspunt van Troukoors is verskeie akteurs wat voorheen net kleiner rolle speel het, het met Troukoors die geleentheid gekry om groter rolle te speel. Hy noem as voorbeeld Bianca
Flanders (sy was in 2021 Chrissie in die dramareeks Nêrens, Noord-Kaap), wat Abi in die reeks speel.
KOSMAAK EN ENTREPRENEUR
Armand is innoverend op verskeie terreine en sy vaardighede strek veel verder as toneelspel. Hy het in 2018 ’n kookboek Armand Kook Kaal, met laekoolhidraatgeregte uitgereik en daarna het sy gelyknamige kookprogram gevolg. Armand Kook Kaal, volume 2, het verlede jaar die lig gesien en hy wil in die nabye toekoms ’n derde kookboek skryf. “Ek sal seker by die laekoolhidraatgeregte hou, want tot dusver het die handelsmerk vir my gewerk,” sê hy.
Tydens die grendeltyd in 2020 het hy nóg ’n sprong in die diep kant gewaag en die eerste Afrikaanse maatsoek-toepassing Koer bekendgestel. “Koer is my baba waarop ek baie trots is, en die
app het nou reeds gegroei tot 50 000 intekenare. ’n Televisie-afspraakprogram is ook in die pyplyn, maar ’n paar dinge moet nog eers gereël word,” vertel hy geesdriftig.
MUSIEKROLPRENT
Armand vertoon binnekort sy musikale talent in die musiekrolprent Mense
Van Die Wind (wat op Showmax of Box Office uitgesaai gaan word). “Ek sing agt liedjies waaronder Kinders Van Die Wind, Ek Verlang Na Jou, en Sonvanger in die rolprent. Dis spesiaal vir my vokale vermoëns getoonset,” sê Armand wat op skool klavierlesse geneem en onlangs weer agter die klawers ingeskuif het.
Dan wag daar nóg ’n Engelse fliek The Gang, waarin hy ’n flambojante, gay man Gigi speel en wat einde vanjaar uitgereik word. Wees ook op die uitkyk vir Armand as Lucas Eloff in die raaiselreeks Spoorloos: Die Eiland, wat Dinsdag 19 Julie op kykNET begin (lees meer oor die reeks in ons volgende uitgawe).
Die 35-jarige akteur sê die grootste les wat hy geleer het sedert sy dramastudie – wat hy in 2009 voltooi het – is om geduld te hê. “Jy moet geduldig wees wanneer jy wag vir werk wat moet inkom, tydens die produksie moet jy ook geduldig wees, want dit is dikwels ’n kwessie van hurry up and
wait, en ná die produksie moet jy weer geduldig wag op nuwe werk wat na jou kant toe moet kom.”
En so moet ons ook maar geduldig wag om hom in sy volgende projekte te sien.