Plunder en handel
Só het Vikings: The Rise And Fall sy skepe gereed gemaak vir sy plundervaart na die verlede.
Vikings: The Rise And Fall
Seisoen 1 Woensdae National Geographic (*181) 21:00 (begin 29 Junie)
Aanhangers van historiese dramareekse soos Vikings, Vikings Valhalla, of The Last Kingdom – National Geographic se nuutste dokkiereeks Vikings: The Rise And Fall is die beste agter-die-skerms-program nóg!
Die reeks is kompleet met die dramatisering van tonele deur kenners van Hands On History en die Ribe VikingeCenter, en histories korrekte kostuums en rekwisiete. Dit neem ons op ’n reis van 300 jaar deur die opgang van die Wikings, hul vroegste avonture langs die Skandinawiese kus, tot groot ekspedisies om York in Brittanje te plunder, Parys te beset, en handel te dryf en terreur te saai deur die ooste van Rusland tot in Bagdad en die weste van Noord-Amerika. Ons het met die vervaardiger Anna O’Malley gesels oor Vikings: The Rise And Fall. Sy was ook een van die vervaardigers van Vikings en Vikings Valhalla (en die treffende periodedramareeks Bridgerton).
ANNA SE WIKINGREIS
Wat was jou beginpunt vir Vikings: The Rise And Fall? Ek het sowat 10 jaar gelede gewerk aan Vikings, die TV-reeks vir die History Channel (*186). Daarna was ek voorverlede jaar die uitvoerende vervaardiger vir Vikings Valhalla vir Netflix. En ek wou nog altyd ’n dokumentêre program oor die Vikings maak. Ek was in kontak met Daniel Sharp, wat Dash Pictures bestuur, en ons het saam met die idee vorendag gekom. Ons het die navorsing tydens die inperking (van Maart tot Mei 2020) gedoen. Feitlik almal wat jy in die program sien – insluitende Stefan Brink (professor van Skandinawiese studies, Universiteit Van Cambridge), Cat Jarman (bioargeoloog en skrywer van The River Kings) en Søren Michael Sindbæk (’n argeoloog by die Universiteit Van Aarhus) – ek het met hul boeke begin. En al die soort bronne wat hulle gehad het. Ek het hulle probeer kontak om ’n onderhoud te voer. Almal in die Wikingwêreld ken mekaar, hulle lei jou dus na die volgende persoon. Nadat ek klaar gelees het, het ek nog inligting bekom deur met almal te gesels.
Vanwaar het julle kostuums en rekwisiete gekry? Kon julle enigiets hergebruik van die twee vorige Wikingreekse? waaraan jy gewerk het? Ons het daarna gekyk – wat ons kon gebruik en of dit kan werk. Maar uiteindelik het ons in aanraking gekom met ’n maatskappy genaamd Hands On History. Hulle is historici, en hulle wou alles so akkuraat moontlik hê. Ek het geweet watter soort goed ons sou benodig danksy my werk aan TVprogramme. En ons dek van die jaar 793 tot by 1066, baie tyd is dus bestee om elke era per episode korrek te kry. Ons sou dit nie kon doen sonder historiese konsultante nie. Ons wou hê historici wat die program kyk, moes opgewonde raak, want dit is korrek!
Waar presies kan ons dit sien? In een van die episodes (episode 3) dek ons die ooste. Daar is baie goed in daardie episode wat mense nog nie voorheen gesien het nie. Ons delf in die handelsnetwerke. En wat ons sien is visueel baie anders as in die ander episodes. Hoe het julle saam met Hands On History en Ribe VikingeCenter gewerk? Pleks van akteurs (in die reeks) te gebruik, het ons mense gebruik wat tonele dramatiseer. The Ribe VikingeCenter is ’n sentrum waar mense soos Wikings leef. Hulle weet presies hoe om te leef (as Wikings) en hulle het in die klere en Wiking-goed belê. Ons het hulle vir drie of vier dae (by Ribe) dopgehou. Hands On History was deel daarvan. Hul konsultante het ons gehelp om kontak te maak met mense wêreldwyd wat historiese tydperke dramatiseer. Baie van hulle werk in spesifiek een tydperk, op een plek. Deur met hulle te praat, kon ons hulle in die een of ander episode plaas.
Waarop het jy antwoorde gesoek? In watter mate het Wikings by samelewings geïntegreer, hoe het hulle verander van mense wat dorpe aanval tot hulle deel van die samelewing geword het. En ons weet nog nie alles nie! Ou argeologiese terreine oopgegrawe met meer inligting word steeds oopgegrawe.