Groot pret en plesier
Elise doen alles om Uys te beïndruk om sy woonstelmaat te word.
Die mediese verteenwoordiger Elise Kruger (Lindie Stander) is weer in die omgewing en haar soektog na ’n blyplek gaan vir komiese oomblikke sorg. Sy is vir tyd en wyl besig met sake by die Binneland-kliniek en wil nie in ’n hotel bly nie – dis darem net te onpersoonlik vir dié kleurvolle karakter. Boonop is haar geld min. Dit lyk asof dinge in haar guns werk, want dr. Uys (Gerald Steyn) is juis op soek na ’n woonstelmaat. “Uys bly in ’n drieslaapkamer-woonstel en het besluit om die een kamer in ’n kantoor te omskep terwyl die ander een vir ’n woonstelmaat beskikbaar is,” sê Gerald. Elise is baie opgewonde oor die nuus, maar sy het mededinging, want die paramedikus Danny (Bradley Olivier) soek ook blyplek. Maar Elise skram mos nie van
’n uitdaging weg nie.
WEN GABY SE GUNS
“Elise maak geselsies met
Gaby (Maude Sandham), Uys se meisie, en vertel Gaby ’n
sob-story oor hoe sy nie ’n plek op haar eie kan bekostig nie en dat Gaby nie hoef te worry as sy Uys se woonstelmaat is nie, want ’n vrou van haar ouderdom sal nie enige moves op Uys maak nie,” sê Lindie. Gaby kry Elise jammer en stel haar gerus dat Elise haar ondersteuning het en sy ’n goeie woordjie by Uys sal doen.
Danny is glad nie beïndruk wanneer hy hoor Gaby steun Elise nie. “Danny weet nog nie van Uys se planne om die derde kamer in ’n kantoor te omskep nie en dink as hy saam met Elise en Uys moet bly, gaan hy nie rus vir sy siel kry nie, want Elise is net een te veel om te hanteer,” sê Gerald.
En wanneer Danny later hoor daar is net een kamer beskikbaar, glo hy dit kom hom wat Danny is toe.
PAK DIE STRYD AAN
Danny en Elise plaas druk op Uys om te besluit wie by hom gaan intrek, maar
Uys weier om te kies en sê Danny en Elise moet self onderling besluit. En Elise laat nie op haar wag nie. “Sy kry die blink plan om ’n live drawing class (waar jy ’n naak persoon skilder) in die woonstel te hou en so vir Uys te beïndruk,” sê Lindie.
Danny dink dit gaan ’n groot flop wees, maar tot Danny en Gaby se verbasing geniet Uys dit wanneer hulle die volgende dag in die deurmekaar woonstel instap, waar boonop ’n spontane partytjie ontstaan het.
Elise trek kort daarna amptelik in en Gaby besef gou dit was nie ’n goeie idee nie. Gaby raak skoon jaloers omdat Elise en Uys soveel pret saam het. “Elise bring ongetwyfeld Uys se wilde kant uit,” sê Gerald. “Weens die erns van sy werk as dokter hou hy juis daarvan, want dit laat hom ontspan.”
Hoe lank Gaby dit gaan toelaat, weet ons nie – Danny moet dalk sy tasse gepak hou.
VERLEDE KEER
Dawid se belangstelling in Annelize was duidelik, die regte Wessel Mouton – Annelize se halfbroer – het sy verskyning gemaak, Liam se onsekerheid het spanning tussen Karen en Gaby veroorsaak, en Tertius het Danny raad oor Elise gegee.
IN DIÉ UITGAWE
Elise se geheime wapen maak Gaby nie so opgewonde soos vir Uys nie, Dawid maak ’n skokkende aankondiging, en Gaby wonder wat tussen Karen en Liam aan die gang is. Chiron maak die Binneland-kliniek ’n baie goeie aanbod, Wessel is verras wanneer Steve met hom praat oor Annelize, en Karen se konfrontasie met Liam gaan nie ongesiens verby nie. Annelize is in ’n slegte bui, Tertius soek na vermiste medikasie, en At vra Louis ’n baie groot guns. Daar is beslis spanning tussen Zee en Gaby, Danny moet mooi dink oor Louis se aanbod, en Steve praat Annelize moed in wanneer sy oor Chiron se aanbod moet besluit. Wessel is ’n gewilde man wat besoekers betref, Naomi se nuus gee Tertius baie om oor na te dink, en Liam praat met Zee oor sy toekoms.
Louis en Naomi is bekommerd oor At en Delia, Tracy is beswaard oor verwerping, en Danny reël vir Louis ’n verrassing. Karen moet vrede maak met haar omstandighede, Rian se tuiskoms verskaf blydskap vir meer as een vrou, en Conrad besef hy word by ’n nuwe familiedinamiek uitgesluit. Delia dink At gaan te ver, Gaby beperk Uys se avontuurlus, en Conrad soek antwoorde. At is nie onder ’n kalkoen uitgebroei nie, Annelize probeer seker maak ander onderhandelinge word nie vergeet nie, en Dawid wil oop kaarte speel. Delia het ’n uitnodiging vir Conrad, Uys is bekommerd oor Gaby se gevoelens, en Annelize kry ’n oproep van Dawid.