Uit Die Slaapkamer
Seisoen 1 VIA (*147) 21:00 Geselsprogram
Adri Vivier lyk sommer interessant. Haar kleurryke uitrustings en haartooisels vang dadelik jou oog, maar dis wanneer jy met haar gesels en haar borrelende persoonlikheid na vore kom, wat sy ’n blywende indruk maak. Sy is ’n paneellid in die geselsprogram oor seksuele gesondheid Uit Die Slaapkamer en haar bydraes bied ’n vars perspektief op veral hoe die ouer geslag seks beskou. “Seks is nie deel van my gewone praatjies nie,” erken Adri. “Maar toe ek vir die reeks genader is, kon ek eenvoudig nie nee sê nie, want dit was ’n kans om my kennis oor die onderwerp te verbreed.
“Interessanthede, soos om hulp by ’n fisioterapeut te kry om jou sekslewe te verbeter, is iets wat my heeltemal verbaas het. Dr. Elna Rudolph (hoofaanbieder en seksuoloog) se kennis strek wyd en ek was verstom toe sy ons in een van die episodes vertel afhangende van jou probleem kan gespesialiseerde fisioterapeute jou met oefening daarmee help, dus is medikasie nie altyd nodig nie.”
In ’n ander segment van die reeks waarin vrae van die publiek bespreek word, het Adri soms erg gebloos. “Ek onthou toe ons oor seksspeelgoed (episode 6, 10 Aug.) gesels het, was ek aanvanklik verward, want ek ken nie die name van die speelgoed nie, en nadat dit aan my verduidelik is, was my wange bloedrooi,” onthou Adri.
Adri is ’n onderwyseres en aktrise. En haar dogters,
Trix Vivier (Petra in die telenovelle Legacy, lees meer op bl. 36) en Lea Vivier (Lilani in die dramareeks Fynskrif) het in haar dramavoetspore gevolg. “My dogters was ondersteunend toe hulle hoor ek is deel van die reeks en het gesê hulle gaan inskakel om te sien wat hulle kan leer.”