Die registrasie- tameletjie OORKANT
As jy gelukkig genoeg is dat jou troeteldier se geboorteproses sonder voorval verloop, is jy steeds nie oor die hond se stert nie. Dis nie net die inentings en ontwurming van die nuwe kroos wat jou beursie gaan karnuffel nie: Professionele telers moet ook sorg dat welpies of katjies by erkende organisasies geregistreer is, en dis hier waar dinge nogal katterig kan raak – veral in hondeland.
Kusa is die enigste organisasie in Suidafrika wat internasionaal geaffilieer is. “Dis die ‘goudstandaard’ wat honderegistrasie betref,” sê Gérard Robinson ( foto onder), lid van Kusa se federale raad en voorsitter van die organisasie se Gautengse provinsiale raad. “Jy moet by Kusa geregistreer wees as jy jou hond se nageslag wil uitvoer of ’n hond van oorsee af wil invoer.”
Daar bestaan egter nie iets soos ’n “Kusageregistreerde” teler nie. “Kusa het lede, en mense sluit om verskillende redes aan – of dit nou vir kompetisies, skoue of grootof kleinskaalse teling is.”
Wees maar katvoet vir telers wat belowe hulle het die regte “papiere” wanneer jy ’n opreggeteelde hond of kat by hulle wil koop, maar net nooit met die regte Kusaregistrasiedokumente vorendag kom nie.
“Daar is ongelukkig ’n groot toename in sogenaamde puppy farms of puppy mills met talle sogenaamde telers wat hulle besigheid as ’n soort tuisnywerheid bedryf,” sê Gérard.
Die probleem is dat Kusa nie by magte is om by registrasie ’n Dnsprofiel van die ouers aan te vra nie. Dit berus dus op ’n vertrouensverhouding. “Ons kan ook nie poliesman speel nie – daar’s nie ’n manier dat ons as ’n soort Dierebeskermingsvereniging kan optree en ondersoek waarom mense by Kusa geregistreer wil wees nie. Kontak dus eerder vir Kusa om seker te maak ’n welpie is inderdaad geregistreer voor jy koebaai sê vir jou banknote.”
Volgens Gérard is mense wat met hulle honde skou, onder die toegewydstes wat slegs uitgesoekte reuns en tewe gebruik en Kusa se standaarde nougeset volg. Hy is onboetvaardig oor die hoë standaarde wat die organisasie stel. “Ons behou ons die reg voor om voorskriftelik te wees en te sê daar is sekere aspekte van ’n ras waarvan ons hou of nie hou nie. Daar’s baie kritiek teen Kusa, maar haal ons uit die SuidAfrikaanse mark en jy sal die hele geskiedenis van geregistreerde honde in die land uitwis.”
Kusa vereis verder dat mikroskyfies ingeplant word voordat welpies by die organisasie geregistreer kan word. “Dit beskerm jou as teler ook,” sê Gérard, “want as daar fout kom, kan jy jou hond gaan haal.”
Erna se bokserwelpies kry hulle mikroskyfies wanneer hulle 56 weke oud is. “Dit word onder die vel by die skouerknop ingeplant, maar boksers is taai en ervaar dit sonder enige tjank.”
Dis egter juis die mikroskyfie wat die groot twisappel onder hondetelers is. >