LANGS DIE R103, KZN-MIDDELLAND
Steampunk Coffee hoort boaan jou lys as jy die Kwazulu-natalse Middelland verken en oorval word deur ’n lus vir goeie koffie. Die ligging – die Thokans-garage langs die R103 (naby die afdraai na Lions River) – is niks om oor huis toe te skryf nie, maar die binnekant én die koffie gaan jou aangenaam verras. Die Durbanse musikant Michael Goddard het in Januarie vanjaar na die Middelland getrek met een doel voor oë: om fantastiese boeretroos te maak. “Ek soek reg oor die wêreld na die beste koffie, maar my winkel gaan ook oor die ervaring: die reuk, die beligting, die musiek, die geselskap.”
Op die spyskaart pronk cappuccino’s en espresso’s en meer eksotiese keuses soos die Shakareto (’n dubbel-espresso met organiese kokosneutblomsuiker op ys), rissiemokka en cappuccino met ’n strooisel kardemom. Daar is ook lekker happies soos biltongen-bloukaasquiche, Deense appelpasteitjies en Portugese pasteis de nata. –Robynjoubert Kontak steampunkcoffee.co.za 072 141 4485
michael@steampunkcoffee.co.za