Tuiste van ’n sir
Laurens van der Post is ’n omstrede figuur. Maar ’n mens kan nie ignoreer dat hy op Philippolis gebore is en hier grootgeword het nie.
Sir Laurens was ’n joernalis, skrywer, oorlogsveteraan, filosoof, filantroop, opvoedkundige, goeie vriend van prins Charles en die peetpa van prins William. Hy het baie tyd saam met die Sanmense van die Kalahari deurgebring en is selfs deur hulle “die wit Boesman” gedoop.
Hy het ’n paar boeke geskryf oor sy wedervaringe in die Kalahari en is in 1955 deur die BBC gestuur om ’n dokumentêr oor die Kalahari en die San te maak. The Lostworld of the Kalahari is in 1956 op TV uitgesaai. In 1981 is hy tot ridder geslaan.
’n Gedenktuin is op Philippolis gebou en uitgelê, en sy as is ook hier toegemessel. Verskillende dele van die tuin verteenwoordig verskillende fases van sy lewe. Die rose verteenwoordig byvoorbeeld Engeland en die sand die Kalahari. Daar is selfs ’n labirint waarop besoekers kan loop.
In Sielskos, die restaurant langs die tuin, is ’n kamer vol van sir Laurens se besittings en boeke, waaronder Margaret Thatcher se outobiografie wat sy vir hom gegee het. Voorin staan geskrywe: “To Laurens. With warm regards.”
Hier is ook ’n kunstenaarshuisie, die Artist’s Retreat, waar kunstenaars en skrywers kan kom bly indien hulle in Philippolis se stilte aan iets wil kom werk. As dit nie beset is nie, kan enigiemand oorslaap. Kontak 073 878 6820 (Elwena Pienaar) vir die restaurant en verblyf.