KOM KRY JOU LÊ IN DIE STROOIKOOI
Zelma het vir die lekker – amper meer as om den brode – ’n unieke gastehuis tussen die wingerde begin. Strooikooi is twee rug-aan-rug selfsorgeenhede, elk met ’n ruim slaapkamer, outydse badkamer en kombuisie.
Die mure is ’n houtstruktuur met strooibale (vandaar die naam) wat dan met ’n kleilaag gepleister is. Die klem, sê Zelma, was op plaaslike hande en goedkoop materiaal. Die huisie het ’n sinkdak en rietplafon, en die vensterrame en deurkosyne is alles tweedehands. Met Zelma se kunstige hand is die binnekant omtower in ’n koel rusplek met stylvolle ligte eenvoud.