Pluk die vrugte...
As die kersies aan die bome verskyn, lei alle paaie na Ficksburg in die Vrystaat. Kom saam met ons op ’n bustoer na die 47ste Kersiefees.
Ficksburg, bekend as die wêreld se kersiehoofstad, lê in die OosVrystaat, een van die mooiste dele in Suid-afrika. Die omgewing is bekend vir sy sandsteenformasies – dieselfde sandsteen wat jy in baie van die geboue in en om die dorp sien (ook die Uniegebou in Pretoria spog met sandsteen uit dié wêreld).
Sedert die eerste Kersiefees in 1968 op Ficksburg gehou is, het dit gegroei tot een van die vernaamste geleenthede op die toerismekalender, en vandag lok die fees nie minder nie as 24 000 mense. Dit word jaarliks in die derde week van November gehou, en feesgangers maak nie net kennis met kersies in al sy gedaantes nie, maar daar’s ook ’n proesel plaaslike vermaak en handwerk.
Reis per bus van Pretoria na die Oos-vrystaat (oor Centurion, Midrand en Johannesburg) op ’n toer sonder tierlantyntjies: Jy ervaar die pret en plesier van die fees sonder dat jy hoef te bestuur of blyplek te soek. Op pad loer jy in by die skilderagtige kunstenaarsdorpie Clarens én die Golden Gate Hoogland- nasionale park. Die naam van dié park is afgelei van die goue kleur wat die sonlig teen die sandsteenkranse maak. Jy sien dalk die skaars baardaasvoël, kalkoenibis, oribi en ’n rits soogdiere.
En natuurlik kan jy uitsien na ’n besoek aan ’n plaaslike kersieplaas waar jy soveel kersies kan eet as wat jy wil!
WANNEER? 20 tot 22 November 2015. PRYS Vanaf R2 900 p.p. wat deel.
PRYS SLUIT IN • Retoer-bustoer uit Gauteng – die bus se sitplekke kan terugleun
en daar is gordyne, ‘n toilet en luidsprekerstelsel. • Twee nagte verblyf. • Twee keer ontbyt en twee keer aandete. • Toegang tot die Golden Gate Hoogland- nasionale park
en ’n kersieplaas