HIER TUK-TUK, DAAR TUK-TUK

Dirkie Coetzee is ’n man met dryfkrag en vindingrykheid – en ongeewenaarde energie. Hy en sy vrou, Thea, woon sedert 1981 al op Uniondale en het saam die “Skoonheidsentrum” op die dorp waar hulle apteekgoed, skryfbehoeftes en van hulle heerlike tuisgebak verkoop. (Die naam het hulle saam met die gebou geërf en dit net nooit verander nie, lag hy.)

Nou is Dirkie ook toergids: Hy het vir hom ’n tuk-tuk gekoop wat met sy eensilinder-dieselenjin alte flink deur die strate prt-prt-prt.

Hy ry met jou in die hoofstraat af en dan is dit stofstrate toe, daar waar die huise ylgesaai tussen die weidingskampe staan. Jy hou stil by die groot ou kurkboom aan die begin van die dorp, die sinagoge, Victoriastraat (met die oudste huise op die dorp), die Engelse begraafplaas, die nagmaalhuisies, die NG kerk. Jy gaan maak selfs ’n draai in die Vrystaat… nee, nie regtig nie – dis die deel anderkant die rivier, op pad grootpad toe. Hier sien jy die rooskwekery en skiet dan gholfbaan toe, waar jy dalk net ’n springbok op ’n setperk sal aantref. Kontak 071 152 1046

uniondaletours@outlook.com