Vloei deur die berge

NABY MOKOPANE

Hierdie is die R518 in die Waterberg, wes van Potgietersrus (nou Mokopane). Wanneer jy op dié pad die berg bereik, kronkel jy op ’n kort pas deur die kloof – dan kan jy reguitaan ry tot by Ellisras (Lephalale) of links draai Vaalwater toe. Die Waterbergreeks is nie gevorm deur ’n kontinentale botsing of vulkaniese uitbarsting nie. Soos ’n mens uit die naam kan aflei, was dié gebied eens op ’n tyd vol massiewe mere en riviere. Die water het stadig teruggetrek, wat groot blokke rooipers sandsteen uitgekalwe het.