G’N SOUTWATER HIER

Ná 18 maande waarin sy haar hare uit haar kop wou trek, het Zof ’n moeilike hekkie in haar verwerkingsonderneming oorkom: Om ’n resep vir hoenderwors en -patties te ontwikkel wat geen MSG, krummels of water bevat nie.

“Ons het dit uiteindelik reggekry. Ons maak nou ’n wors wat net so eerlik is soos ons hoender,” sê sy opgewonde.

“Een van ons grootste verrassings was om uit te vind wat regtig met kos gebeur voordat dit in supermarkte beland. Vars hoenders word byvoorbeeld in soutwater en preserveermiddels gedoop.”

Dis baie algemeen om soutwater in hoender te spuit voordat dit gevries word – dit maak die hoender sappiger en geuriger, sê pluimveeverwerkers. Maar Zof weier volstrek om deel te wees van dié praktyk. “Die soutwater gee op ’n kunsmatige manier ekstra gewig aan ’n hoender, en uiteindelik betaal klante vir water. Ons is trots op ons produk en wil altyd eerlik wees. Ons wil ’n hoender produseer wat nie vol medisyne of hormone is nie. Dié manier van boer gaan ons nooit ryk maak nie, maar minstens sukkel ek nie om te slaap nie,” sê Zof.