Cymbidiums
Wat was ’n troue of Moedersdag in die jare tagtig sonder ’n Cymbidium-skouerruiker of ’n enkelblom in ’n boksie? Dié orgideesoort met sy lang, dun blare en wasagtige blomme is vandag nog net so gewild.
In die natuur Cymbidiums kom voor in die vogtige en sonnige (maar koeler) voetheuwels van die Himalajas en hou van koue winters (sonder ryp!) wat die vorming van blomknoppe vir die lente aktiveer. Die plante kon vir lank nie in subtropiese gebiede gekweek word nie omdat daar nooit ’n vlaag koue is om blomvorming te aktiveer nie, maar gelukkig het iemand ’n tropiese Cymbidium in China ontdek en dit met ’n ander soort gekruis om ’n hittebestande plant te verkry wat in subtropiese gebiede soos Kwazulu-natal sal groei. (Dié soort is onder meer te kry by Raindance Orchids by Munster in KZN en die Riebeekvalleituinsentrum in die Wes-kaap.) In die huis Jy kan jou Cymbidium uit die winkel in die huis hou terwyl dit blom, maar plant dit daarna so gou as moontlik in die tuin uit omdat hulle verkies om buitenshuis te groei. Die plante moet genoeg lig kry (nogmaals: nie direkte sonlig nie); die lug moet vogtig wees; en die groeimedium – gewoonlik bas – moet vinnig dreineer. Kleipotte werk ook beter as geglasuurde of plastiekpotte omdat dit vinniger droog word en “asemhaal”. Water Sorg dat die groeimedium te alle tye klam bly, veral in die warm somermaande, maar maak ook seker al die water dreineer behoorlik. Gee jou plante in die somer ’n baie flou (kwartsterkte) vloeibare bemesting soos Nitrosol – rofweg elke ses weke. Daar is heelwat spesifieke orgideekos beskikbaar; loer by jou naaste tuinsentrum wat beskikbaar is en volg die aanwysings baie noukeurig. Dit is sleg vir die plante as sekere voedingstowwe en soute in die grond opbou. Wat doen ek as hulle klaar geblom het? Wag ’n week of drie nadat die plant begin blom het, sny die blomstingel onder teen die basis af en sit dit in ’n blomvaas met water waar dit lank sal hou. Vat nou die plant buitentoe, plant dit oor in vars groeimedium (verkieslik bas) en sit die pot op ’n stomp of tafeltjie in ’n lekker skadukol onder ’n boom waar dit oggendspikkelson kry, maar beskerm dit teen middagson en natuurlik slakke, vir wie die blomknoppe ’n heerlike Caesarslaaitjie is. Laat die plant sommer saam met jou tuinbesproeiing water kry, al is dit daagliks in die somer, want die bas dreineer vinnig. Hoekom vrek hulle? Dis maar die ou storie: Te min of te veel lig en/of te min of te veel water.