Plant, kook en eet inheems
Die Good Hope Gardens-kwekery, reg langs die Kaappunt-natuurreservaat, is ’n familieonderneming waar die Grays al langer as ’n kwarteeu byna 300 verskillende soorte inheemse plante self kweek – van fynbos tot vetplante uit die Karoo en Namakwaland en struike en aalwyne uit die Oos-kaap en Kwazulu-natal.
BEGIN SÓ ’N INHEEMSE FYNBOSTUIN
Tom Gray, eienaar van Good Hope Gardens Landscaping, deel sy wenke. • Hoe gouer, hoe beter “Tuinmaak is ’n langtermynprojek. Jy moet bereid wees om voortdurend te leer.” • Wees net geduldig “’n Volgroeide tuin gaan deur heelwat stadiums en plante gaan moontlik verskuif en vervang moet word soos die mikroklimaat in jou tuin verander deur plante wat groter raak.” • Inheems is baie spesifiek “Daar is heelwat biome en mikroklimate in Suid-afrika. As ’n plant inheems is aan Suid-afrika, beteken dit nie dit gaan oral werk nie. ’n Plant wat goed aard in Constantia, kan heel moontlik nie die mas opkom in Kommetjie nie. Wees baie gebiedspesifiek as jy plante vir jou tuin kies. Gesels waar moontlik met ’n kenner.”
SOEK EN KOOK KOS UIT DIE BOS EN SEE
Die “opwindende geure en groot verskeidenheid” van die eetbare fynbos en seewier in die omgewing het Roushanna Gray, Tom se vrou, só geïnspireer dat sy voor die kospotte begin eksperimenteer het. Vandag bied sy op Saterdae halfdagkursusse aan vir grootmense en kinders: Eers leer jy hoe om eetbare plante te identifiseer en pluk, en dan is dit kombuis toe, waar jy self daarmee kook. Uiteindelik lê almal saam weg aan hulle skeppings. • Die Coastal Foraging-kursus word aangebied by die getypoele van Scarborough se strand waar jy seewier en mossels “oes” en dan middagete kook by Gael’s Beach Cottage. (Onthou om vooraf by jou naaste poskantoor ’n mosselpluklisensie te kry – dit kos R94.) • Die Fynbos Foraging-kursus word in die kwekerytuine aangebied waar jy inheemse eetbare plante, organiese groente, eetbare blomme en wildekruie pluk. Roushanna leer jou van dié plante se medisinale waarde, hoe om dit in jou tuin te kweek en hoe om daarmee te kook. Ná die toer berei jy jou eie ete. • Die Foraging for Children-kursus is ’n opwindende oggend waar Roushanna kinders meer oor fynbos leer en wys van watter plante bye en skoenlappers hou. Daarna maak hulle pizzas met groente, blomme en kruie wat hulle self gepluk het, en drink fynbostee. Wanneer? Hou Good Hope Gardens se Facebook-blad dop vir nuwe datums. Prys R500 p.p. (R200 vir kinders o.17; gratis vir o.2’s). ’n Groep van 4 betaal R1 800. Kontak 021 780 9299 goodhopegardens nursery.co.za roushanna@hotmail.com
Good Hope Gardens Nursery
“Om jou hande in die grond te druk is om jou siel te verplaas na daar waar goed nog vrylik groei, ongeag waar jy jou bevind. Om vuil voete te hê is om weer kind te wees. Om grond om te woel is om jou hart voor te berei sodat ook daar goeie goed kan opkom. In ’n groentetuin word jy weer bewus van die weer, van die weergalose krag én die broosheid van die natuur, van plante se verset teen jou wil.” – Emilia le Roux, uit Waar vye nog soet is