HOESÊ?
Geenspit-bedding (foto bo). Anders as tradisionele landbou- en tuinmaakmetodes word grond in permakultuur so min as moontlik versteur. No-digbeds word “opgebou” deur lae organiese materiaal soos strooi, blare en kompos opmekaar te stapel. Vrugte en groente word direk in dié lae geplant sonder om gate in die grond te maak.
Hoendertrekker ’n Ligte hoenderhok sonder ’n vloer, ook bekend as ’n chicken tractor, wat elke week of drie na ’n volgende bedding in jou tuin geskuif word. Die hoenders help die grondtekstuur verbeter met al hulle geskrop – sonder om die grondekologie te versteur soos wat gebeur as jy grond omspit. Die hoenders breek die plantmateriaal wat hulle eet, in kleiner stukkies en skrop dit in, wat help met komposvorming. Hulle eet ook graag goggas wat in die grond oorwinter.
Kruiespiraal Deur kruie in ’n spiraalvorm te plant gebruik jy die beskikbare ruimte doeltreffend en skep verskeie mikroklimate vir plante met verskillende behoeftes wat sonlig en wind betref. Die ontwerp is nie net mooi nie – dit maak dit ook maklik om die kruie te oes.
Kontoersloot Dié slote ( swales) volg die kontoer van ’n heuwel om reën wat teen ’n heuwel afloop op te vang. Die water infiltreer die grondprofiel om die kontoersloot en vul die grondwater aan. ’n Kontoersloot kan ook erosie van bogrond voorkom omdat dit die spoed van die reënwater se vloei breek. As dit genoeg reën, kan die opgaarwater vir besproeiing elders in die tuin gebruik word.