Bokmelkkaasslaai met soet asyn en vinkelsuursuiker

Genoeg vir 4 Bereidingstyd 10 minute Gaarmaaktyd 20 minute

Jy benodig

VIR DIE SOET ASYN

• 150 ml goeie witwynasyn

• 200 g bruinsuiker

VIR DIE VINKELSUURSUIKER ( SHERBET)

• 120 g versiersuiker

• 1½ teelepel (7,5 ml) sitroensuur

• 1½ teelepel (7,5 ml) koeksoda

• 1 teelepel (5 ml) heel vinkelsaad

VIR DIE SLAAI

• 300-350 g bokmelkkaas – gebruik minstens 3 verskillende soorte (ons het chevin, crottin en ’n harde bokmelkkaas gebruik)

• 1 klein bakkie murgpampoentjies, in linte gesny

• 1 klein pakkie Franse groenboontjies

• 4 swart erfenistamaties, in skywe gesny

• 150 ml goeie ekstrasuiwer olyfolie

Só maak jy

Maak die soet asyn Verhit die asyn en suiker in ’n kastrolletjie tot kookpunt. Draai die hitte laer en laat dit prut tot die suiker opgelos het. Laat dit eenkant afkoel. Maak die suursuiker Gooi al die bestanddele in ’n versapper en pols dit vir ’n paar minute saam. Gooi die suursuiker deur ’n sif en bêre dit in ’n lugdigte houer. Sit dit voor Rangskik die kaas op ’n opdienbord of verdeel dit tussen vier individuele borde. Pak die murgpampoentjielinte bo-op, gevolg deur die boontjies en tamatie. Drup die soet asyn en lekker baie olyfolie oor. Sprinkel die vinkelsuursuiker oor en sit dit dadelik voor.

Platteland sê Jy kan ook geroosterde okkerneute by die slaai voeg – vervang dan die olyfolie met okkerneutolie.