Aspersie-en-ertjiesop

Genoeg vir 4 Bereidingstyd 5 minute Gaarmaaktyd 15 minute

Jy benodig

• 2 eetlepels (30 ml) olyfolie

• 30 groenaspersies, gekap

• 300 g vars of bevrore ertjies

• 4 sprietuie, gekap

• 10 g Italiaanse pietersielie, gekap

• 1 koppie (250 ml) volroommelk

• 100 ml room

• sap van 1 suurlemoen

• 10 g vars mentblare, gekap

• 1/3 koppie (80 ml) suurroom

• varsgemaalde witpeper

• 40 g vars ertjieranke en -blomme vir garnering

• oondgeroosterde parmesaanbruschetta of melbaroosterbrood om voor te sit

Só maak jy

Verhit die olyfolie in ’n kastrol, voeg die gekapte aspersies, ertjies, sprietuie en Italiaanse pietersielie by en soteer dit vir 3-4 minute oor lae hitte.

Voeg die melk en room by, verhit dit tot kookpunt en draai dan die hitte laer. Prut die mengsel vir ’n paar minute, haal dit van die plaat af en voeg dan die suurlemoensap en gekapte ment by. Gooi die mengsel in ’n voedselverwerker en pols dit vir 4-5 minute tot glad. Geur die sop met sout na smaak.

Verhit weer die sop en skep dit in vier bakkies. Voeg ’n skeppie suurroom en ’n paar draaie witpeper by elke bakkie en garneer dit met ertjieranke en -blomme. Sit dit voor met parmesaan-bruschetta of melbaroosterbrood.