Blikbrein- biltong

Mense gooi daagliks ou rekenaarbokse weg. Ek het al die binnegoed (behalwe die kleiner waaiertjie aan die bokant) uit ’n ou rekenaarkas gehaal en ’n gloeilamp geïnstalleer. Al die openinge is toegemaak met gaasdraad en ek het twee dwarsbalkies ingesit waaraan jy biltong en wors kan ophang. Ek gebruik sommer skuifspelde vir die biltong, en die wors word net so oor die dwarsbalkie gehang met kombuispapier onderin. Die rekenaarkas word dan verseël met sy deksel.

Die gloeilamp verskaf hitte, die waaiertjie sorg vir lugsirkulasie en die hele storie staan in die kombuis en lyk nes ’n kombuisrekenaar. Eers as jy nader staan, gewaar jy die vleis binne-in.

Dit neem onderskeidelik 3-4 en 5-6 dae voor die droëwors en biltong reg is om te eet. Te lekker.