GM IS KENNERSKOS

Dit is waarskynlik ’n bietjie mosterd ná die maal, maar ek het ongelukkig eers onlangs Platteland #7 te lees gekry met die reaksie op julle artikel oor GM. Ek skryf om julle te bedank dat julle ’n kenner van die onderwerp gevra het om die artikel te skryf.

Gm-tegnologie is ongelukkig steeds in ’n spiraal van negatiewe opvattings en onakkurate feite vasgevang, en die klomp briewe in Platteland bewys dit nogmaals. Die skrywers maak deur die bank foutiewe (selfs absurde!) afleidings en bewerings wat weer die volgende stel lesers gaan beïnvloed... Dit is ongelukkig per definisie ’n tegniese onderwerp wat nie onder die knie gekry kan word deur “slegs vier artikels te lees” nie.

Vir diegene wat in die feite belang stel, gaan dit nog baie gesprekke verg om al die misverstande uit die weg te ruim. Vir dié met ’n beginselbeswaar of eie agenda sal dit natuurlik nooit gebeur nie en hulle sal aktief aanhou om onakkurate inligting te versprei. By Biosafety SA het ons onlangs met ’n inisiatief begin om die gesprek se fokus ’n bietjie te verskuif na Suid-afrika se wêreldklas regulatoriese stelsel wat die nodige kundigheid, verskeidenheid, verteenwoordiging, mandaat en pligsbesef het om ons verbruikers én innoveerders se belange te beskerm.

As die huidige kommersiële GM gewasse rêrig skuldig was aan al die goed waarvan dit so oppervlakkig beskuldig word, sou dit werklik al die betrokkenes, ook wêreldwyd, “om die bos kon lei”? Nee!

Dankie vir ’n baie interessante tydskrif en die onderhouding van die droom om eendag weer terug te trek platteland toe!