Aan die hoof
Soos met enige plattelandse dorp is die hoofstraat Gansbaai se sakekern, en op Saterdagoggende is dit bedrywig. Al die gewone geriewe en goedere is hier beskikbaar, tesame met eetplekke en snuisterywinkels. Sommige winkeleienaars kla egter dat die breë, reguit strook pad slegs as deurgang dien na Kleinbaai, die hawe net buite die dorp van waar die meeste van die haaikykbote vertrek. Min besoekers en toeroperateurs neem die tyd om hier stil te hou en die dorp se hoeke en draaie te verken.