Vangs van die dag

By die Gansbaai-vismark, een van die gewildste viswinkels op die dorp, spog die kok, Magdalene Loff, met ’n geelstert wat vroeër die dag uitgetrek is. André en Henriëtta Roux, eertydse stadsjapies wat die plek besit, bedryf dié eetplek in die hawe al die afgelope vyf jaar en sê hulle sal die lewe hier vir niks verruil nie. By die mark kan jy ’n groot verskeidenheid (en ruim porsies) vars seekos geniet. Chopin (of Tjoppie), die kat, is altyd by as ietsie dalk van die bord af glip.