Kom saam Botswana toe
Wil jy Afrika op sy beste ervaar, maar nie op jou eie nie? Sluit dan by ons aan vir ons Trans-botswana-toer, in samewerking met Bhejane 4x4 Adventures.
DAG 1 Ons kry mekaar in Letlhakane, Botswana, en kies dan koers op ’n sandspoorpad tot op die vlaktes van die Makgadikgadipanne, waar ons die eerste nag op Kubu-eiland slaap.
DAG 2 ’n Sonsopkoms oor die panne met jou koffie en beskuit is iets wat die doutrappers en ywerige fotograwe nie sommer sal vergeet nie. Ná ontbyt stap ons om die eiland met sy fassinerende rotsformasies en massiewe ou kremetartbome. Dan mik ons noordwaarts op ’n tweespoorpad al langs die panne. Ons bestemming? Maun.
DAG 3 Ons bring die oggend in Maun deur, waar ons inkopies doen en brandstof ingooi. Jy kan ook vir ’n uur lank oor die Okavangodelta vlieg (dié vlug van R1 000 is opsioneel en nie by die toerpakket ingesluit nie). Dan val ons in die pad na ons volgende blyplek, op die oewer van een van die delta se hoofkanale.
DAG 4 Ná ’n paar dae se lang rywerk is dit tyd om te ontspan. Ons geniet ’n laatontbyt in die kamp, wat bekend is vir sy voëllewe. Laatmiddag gaan ons op ’n bootrit deur die Okavangodelta se pansteelgebied.
DAG 5 Vandag mik ons na Namibië. Maar eers draai ons van die hoofpad af om die Tsodilokoppies met hulle meer as 3 000 Boesmantekeninge te besoek. Ons luister na ’n interessante gesprek oor die Boesman, besoek ’n museum en hou piekniek in hierdie wonderwêreld, die hoogste punt in Botswana. Dan is dit verder noordwaarts tot by ’n skaduryke oornagkamp op die oewer van die Okavangorivier in Namibië, ons basis vir die volgende drie nagte.
DAG 6 Vandag kan almal self besluit wat hulle met die oggend wil maak. Jy kan in die kamp ontspan of die nabygeleë Bwabwatawildreservaat besoek. Daar is ook ’n rits ander aktiwiteite, soos kanoritte, kulturele toere en hengel naby die kamp. In die laatmiddag gaan ons op ’n bootrit en kyk hoe die son oor die Okavango sak. Al die aktiwiteite, met die uitsondering van die bootrit, is vir jou eie rekening.
DAG 7 Ons besoek die Mahango-wildreservaat. Mahango spog met vier van die Groot Vyf en is alombekend vir sy groot getalle bastergemsbokke en swartwitpense.
DAG 8 Ons pak kamp op en kies koers via die Zambesistrook (Caprivi) na ons volgende kamp, op die oewer van die magtige Choberivier net buite Kasane in Botswana. Hier sal ons die laaste drie nagte van ons avontuur bly.
DAG 9 Ná ontbyt gaan ons op ’n bustoer na die Victoriawaterval. Ons geniet ’n piekniek- middagete, bekyk die omgewing en doen inkopies in die dorpie Victoria Falls. Die dapperes kan avonture soos rekspring en helikopterritte aandurf (dit kos ekstra).
DAG 10 Ons doen ’n wildkykrit op ’n oop safarivoertuig deur die Chobe- nasionale park, en ’n sonsondergangvaart op die Choberivier. Dis ons laaste aand en tyd vir kuier: Sit tot ounag om die kampvuur waar ons vir oulaas die kameraderie en vriendskap kan geniet wat deur ons Afrikabosavontuur gesmee is.
DAG 11 Ons groet en vertrek na ons verskillende tuistes, maar net tot ons volgende avontuur saam...