Voertsek, jou vabond!
Meng jou eie tuinvriendelike pesdoders met hierdie vyf resepte wat Vanessa self getoets het – of vat ’n verantwoordelike kortpad met organiese pesdoders wat kommersieel beskikbaar is.
SLAKKE
Jy benodig • 1 koppie (250 ml) vulkaniese rots-as of hout-as (gebruik hout-as uit jou braai, maar bly weg van braaibriket-as)
Só maak jy Grawe ’n slootjie (3 cm diep, 10 cm breed) om jou beddings en vul dit met die poeier. Gooi ná reën ’n vars droë laag, of verkrummel die as in ’n sagte poeier nadat die son al die water weggebak het. Hou Vir ewig. Werk Dadelik. Wend dit aan Laatoggend op ’n sonnige dag.
Wend dit weer aan As dit nat word.
Werd om te weet • Stel jou voor hoe ’n eetlepel droë meel in jou mond sal voel – die poeier het dieselfde uitwerking op ’n slak se lyf. • Vulkaniese rots-as bevat spoorelemente wat die grond sal voed, maar groot hoeveelhede hout-as kan tot ’n magnesiumtekort lei. ’n Goeie teenvoeter is om 50 g Engelse sout in 4 liter water op te los en dié mengsel op die blare te spuit om magnesium aan die plant te verskaf. Organiese alternatief uit die winkel Biogrow Ferramol
MIERE
Jy benodig • ½ koppie (125 ml) koeksoda • ½ koppie (125 ml) versiersuiker
Só maak jy Meng die twee bestanddele en sprinkel dit waar die miere loop of los ’n bietjie in ’n vlak bakkie waar die miere uit die muur kom. As jy dit buite gebruik, moet jy iets bo-oor sit en ’n opening maak waar die miere kan inkom. Hou Etlike maande. Werk Binne 24 uur. Wend dit aan Enige tyd is goed, maar die mengsel moet droog bly om doeltreffend te wees.
Wend dit weer aan By enige nuwe plek waar die miere uitkom – hulle sal die plekke vermy waar jy die poeier neersit.
Werd om te weet • Slegs versiersuiker is fyn genoeg om die koeksoda te verbloem – ander soorte suiker sal nie werk nie. • Die mengsel moet poeieragtig wees om doeltreffend te bly – roer dit gereeld om dit sag te hou. Dit sal nie werk as dit nat of hard word nie. • Om van ’n hele mierkolonie ontslae te raak kan jy ¼ koppie (60 ml) koeksoda en 1 liter witasyn meng en dit by die miersgat afgooi. Asyn is ’n natuurlike onkruiddoder; moet dit dus nie in jou blom- of groentebeddings gebruik nie, anders sal jou plante ook vrek. Organiese alternatief uit die winkel Biogrow Pyrol
PLANTLUISE
Jy benodig • 1 knoffelbol • 4 uie • 1 eetlepel (15 ml) brandrissies
(opsioneel, vir ekstra oemf) • 2 eetlepels (30 ml) sonneblom
of canola-olie • 2 eetlepels (30 ml)
skottelgoedseep
Só maak jy Kap die knoffel, uie en rissies grofweg en gooi dit in ’n emmer. Gooi 3 liter kookwater oor en laat dit vir 24 uur trek. Gooi dit deur ‘n sif. Voeg die olie en skottelgoedseep by, skud dit en spuit dit direk op die insekte. Hou 2 weke in die yskas. Werk Binne 24 uur. Wend dit aan Teen skemertyd in droë weersomstandighede.
Wend dit weer aan Elke 2-3 dae tot die luise boedel oorgee.
Werd om te weet • Die knoffelgeur sal vir 3-4 weke aan die plant klou – moet dit dus liefs nie voor oestyd of enigsins op blaargroente soos slaaiblare of spinasie gebruik nie. • Moenie dit op peulgewasse
spuit nie. • Onthou, hierdie kragtige insekdoder sal insekte in alle stadiums laat vrek. Dit wis ook alle soorte kewers, motte, dopen wolluise, witvlieg, snywurms, rooispinnekopmyte en slakke uit en werk selfs as swamdoder. Organiese alternatief uit die winkel Biogrow Bioneem, Biogrow Pyrol of Biogrow Neudosan
RUSPES
Jy benodig • 2 teelepels (10 ml)
skottelgoedseep • 1 liter warm water • 1 teelepel (5 ml) neem-olie
Só maak jy Meng die skottelgoedseep en warm water en voeg dan die olie by. Gooi dit in ’n sproeibottel en skud dit goed. Skud die bottel gereeld terwyl jy spuit om te keer dat die olie en vloeistof skei. Spuit dit direk op die ruspes of onder die blare op hulle eiers. Hou 1 maand. Werk Binne 24-48 uur ná kontak of binne 3-5 dae nadat die ruspes die blare eet wat jy gespuit het.
Wend dit aan In die laatmiddag in droë weersomstandighede.
Wend dit weer aan Elke 5-10 dae tot die pes weg is, of ná reën.
Werd om te weet • Die neem-olie kleef aan die blare, wat die ruspes dan eet. Die neem-olie befoeter die ruspes se spysverteringstelsel en keer dat hulle motte word. • Spuit die mengsel liefs in die aand sodat dit nie voordelige insekte wat gedurende die dag aktief is skade aandoen nie. • Diatomiet, beter bekend as
diatomaceous earth, is baie doeltreffend teen ruspes indien die poeier direk op die insek gesprinkel word. Organiese alternatief uit die winkel Margaret Roberts Biological Caterpillar Insecticide
POEIERAGTIGE MEELDOU
Jy benodig • 100 ml volroommelk •150 ml water
Só maak jy Meng die melk en water in ’n sproeibottel. Spuit die blare van bo af sopnat en lig dit dan op om ook die onderkant te spuit. Maak seker die hele blaar is deurdrenk. Onthou, hierdie sproei maak net die swam dood en keer dat dit versprei – besmette blare sal nie weer groen word nie. Hou vir 48 uur in die yskas. Werk Binne 24-72 uur. Wend dit aan Vroegoggend in
sonnige weer.
Wend dit weer aan Elke 3-7 dae tot die skimmel verdwyn; ná reën; of as ’n voorkomende maatreël elke 2 weke.
Werd om te weet • Vermy pesweerstandigheid deur die sproei elke 4 weke af te wissel met ’n mengsel van 1 eetlepel (15 ml) koeksoda, 3 liter water en 2½ eetlepels (37,5 ml) sonneblomofof canola-olie. • Die melk reageer met sonlig en vorm ’n swamdoder wat ook die plant se immuunstelsel ’n hupstoot gee. • Begin die blare spuit die oomblik as jy die meeldou gewaar – dit is hoogs aansteeklik en sal vinnig versprei. As die blare eers geel word en afval, is die plant en oes daarmee heen. Organiese alternatief uit die winkel Biogrow Copper Soap.