Die diatomiet-doodskoot
Wat is dit? Diatomiet, ook bekend as diatomaceous earth, is ’n grys poeier van versteende mariene fitoplankton.
Hoe werk dit? Dit is ’n fisieke pesdoder – nie ’n chemiese middel nie – en daarom kan peste nie weerstand opbou nie. Die verpoeierde fitoplankton-skelette bestaan uit amper suiwer silika en ’n paar spoorelemente. Onder ’n mikroskoop lyk dit soos glasskerwe. As ’n insek daarmee in kontak kom, klou dit soos Velcro en begin die sagte eksoskelet binnedring, wat die insek laat ontwater en vrek.
Is dit skadelik? Daar bestaan heelwat meningsverskil oor diatomiet (die ekoloog Dave Pepler is byvoorbeeld glad nie ’n aanhanger nie) omdat dit dodelik is vir amper alle insekte, veral miere, vlooie, kakkerlakke, ruspes en ja, ook voordelige insekte (maar nie erdwurms nie). Diatomiet is egter heeltemal veilig vir mense en diere. Baie mense eet voedselgraad-diatomiet as ’n kolonreiniger en ontwurmingsmiddel, en dit word ook in kommersiële ontwurmingsmiddels en vlooipoeier vir troeteldiere gebruik.
Onthou, diatomiet moet droog wees om te werk; gebruik altyd voedselgraad-diatomiet (nooit die swembadsoort nie); en moet nooit die poeier inasem nie.