Korrel mooi
Min dinge is so lekker as ’n tros druiwe wat in die somerson uitgeswel en kleur gekry het. Laat die lekkerte langer hou met dié klompie soet en sout geregte.
Die sappige knars van ’n ferm, soet druiwekorrel tussen jou tande kondig net een ding aan: Somer! Juis omdat dit so ’n heerlike skoon, vars en koel smaak is, dink ’n mens dikwels nie daaraan om met druiwe te kook nie. Dalk het jy al ’n hand vol druiwekorrels in ’n romerige slaai met hoenderrepies probeer. Of ’n paar korrels gevries om in die plek van ys in mengeldrankies te gebruik. Maar het jy dit al gerooster sodat die skilletjies begin krimp en die sap gekonsentreerd en stroopsoet raak? Sit dan ’n takkie tiemie en ’n lepel heuning by…