Kaaskoek met druiwe
Genoeg vir 6-8 Bereidingstyd 20 minute Stoltyd 6 uur of oornag
Jy benodig
• 1½ koppies (375 ml) water
• 1 boks (250 g) Ina Paarman se Suurlemoen kaas koekmengsel
• 1 koppie (250 ml) vars room
•1 pakkie (125 g) vingerbeskuitjies
• ½ koppie (125 ml) sjerrie of Van der Hum
likeur of lemoensap
• 500 g rooi of swart druiwe
• 500 g groen druiwe
• 1 koppie (250 ml) Griekse jogurt
• ¼ koppie (60 ml of 25 g) amandelvlokkies,
liggies gerooster in ’n klein droë pannetjie
Só maak jy
Meet die water af in ’n middelslag-mengbak. Sprinkel die Kaaskoekmengsel oor die water en klits dit tot dit goed gemeng is. Klits die room in ’n kleiner mengbakkie tot dit net-net ferm is. Gebruik dieselfde klitser en klits weer die kaaskoekmengsel tot dit glad is. Vou die geklitste room liggies by die kaaskoekmengsel in met ’n spatel of metaallepel en roer dit tot alles gemeng is. Skep ’n derde van die kaaskoek in die opdienbakkies en maak die bokant gelyk.
Sny die vingerbeskuitjies middeldeur en doop dit in die sjerrie, likeur of sap. Pak die koekies regop teen die rand van die bakkies (soos op die foto). Pak dan die res van die koekies, ook gedoop in sjerrie, en die kaaskoekmengsel in lae in die bakkies. Smeer die jogurt oor die nageregte en skep laastens die druiwekorrels bo-op. Bedek die bakkies en sit dit vir ’n paar uur of oornag in die yskas om te stol. Sprinkel van die geroosterde amandelvlokkies oor net voordat jy dit voorsit.