SÓ ROOK JY TUIS

Hoeveel kole jy nodig het en hoe lank jy iets moet rook, word bepaal deur dít wat jy rook, maar die metode bly dieselfde.

1 Pak braaibrikette in jou ketelbraai en steek dit aan – moenie die soort brikette gebruik wat met aansteekvloeistof behandel is nie.

2 Plaas ’n paar hande vol saagsels

op ’n groot stuk foelie. Vou die foelie toe soos ’n koevert en maak drie kepies van omtrent 3 cm in die bokant – dit is waardeur die rook gaan ontsnap. Jy kan ook die saagsels week en nat op die kole sprinkel, maar die foeliepakkie is beter omdat dit sorg dat die saagsels langer rook sonder dat dit die kole smoor of aan die brand raak.

3 Sodra die kole ’n grys lagie as kry, moet jy dit na die een kant van die braai toe krap.

4 Sit aan die teenoorgestelde kant

van die kole ’n groot foeliebak met water onderin die ketelbraai (of gebruik bier).

5 Sit die pakkie met saagsels (met die kepe na bo) halfpad bo-op die kole en wag tot dit begin rook.

6 Sit die rookrakkie of rooster bo-oor,

op die hoogste verstelling: Die vleis moet reg bo die water op die rooster gepak word. Sit die deksel op en draai die ventilasiewieletjie halfpad oop. As jy vir langer as 2 uur gaan rook, sal jy die water, kole en saagsels moet aanvul. Moet egter nie die heeltyd loer nie – elke keer as jy die ketelbraai oopmaak, gaan ’n geweldige klomp hitte en rook verlore. Solank daar nog rook by die ketelbraai uitkom, is dit nog piekfyn!

7 ’n Braaitermometer sal handig te pas

kom om die temperatuur van die braai en vleis te toets, aangesien gerookte vleis baie anders lyk en voel as wanneer jy dit normaalweg braai.